QR BǴM: Qazaqstanda jas ǵalymdar sany artyp keledi
ASTANA. QazAqparat - Qazaqstanda óziniń ómirin ǵylymǵa arnaǵan jastar artyp keledi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR BǴM «Ǵylym qory» AQ prezıdenti Amandyq Tóleshev málim etti.
«Ǵylymı qyzmetkerler sanynyń ósýi úrdisi belgilendi, ıaǵnı 2011 jyldaǵy 18 myńnan 2014 jyly 25,8 myńǵa deıin (1,4 esege) artty. Sonymen qatar ǵylymǵa baǵyt alǵan jastar da kóbeıdi. Atap aıtqanda, 35 jasqa deıingi ǵalymdardyń sany 2011 jylǵy 6 487-den 2014 jyly 9 447-ge deıin jetti, bul turǵyda ósim 1,5 eseni qurap otyr»,-dedi A. Tóleshev.
Osy oraıda ol Thomson Reuters (AQSh), Springer (Germanııa), Elsevier (Nıderland) sekildi aldyńǵy qatarly kompanııalarmen jáne basylymdarmen eldik lıtsenzııaǵa qol qoıý nátıjesinde memleket álemdik aqparattyq resýrstarǵa aqysyz qoljetimdilikti qamtamasyz etkenin eske saldy.
«Osy oraıda Qazaqstan ǵalymdarynyń halyqaralyq reıtıngti basylymdarda ǵylymı maqalalardy jarııalaý deńgeıi aıtarlyqtaı artqany baıqalady. 2014 jyly halyqaralyq jýrnaldarda 2 784 ǵylymı maqala jarııalandy, bul óz kezeginde aldaǵy jylǵa qaraǵanda 1,5 esege artyq boldy»,-deıdi ol.
Onyń aıtýynsha, 2015 jyly respýblıkalyq bıýdjetten ǵylymdy qarjylandyrýdyń jalpy somasy 43,6 mlrd. teńgeni qurady. 2016 jyly osy baǵytqa qarjy bólý deńgeıi byltyrǵy kólemde saqtalady dep kútilýde.
