QR BǴM qashyqtan oqyǵan balalardyń bilimin jetildirmek
NUR-SULTAN. QazAqparat – Bastaýysh bilimniń 24%-y jáne jalpy orta bilimniń 18%-y ınternet arqyly berilgen, dep habarlaıdy QazAqparat finprom.kz portalyna silteme jasap.
2020 jyldyń tórtinshi toqsanynda bastaýysh bilim qyzmeti 74,8 mlrd tg bolǵan, bir jyl burynǵymen salystyrǵanda 36,4%-ǵa artyq. Negizgi jáne orta bilim osy kezeńde 367,6 mlrd tg boldy, jylyna 32,7%-ǵa artqan.
Bilim berý salasynyń 9,2%-y bastaýysh bilimge tıesili, jalpy orta bilim 45,1%-dy quraıdy.
Qyzmetterdiń barlyǵyn derlik, ıaǵnı bastaýysh bilimniń 95,5%-yn jáne orta bilimniń 95,9%-yn memleket qarjylandyrǵan.
Internet jelisi arqyly bastaýysh bilimge 17,6 mlrd tg, orta bilimge 65,3 mlrd teńge jumsalǵan. Bul jalpy qyzmetterdiń 24% jáne 18%-ǵa jýyǵy.
Internet arqyly bilim berý jáne qashyqtan oqytýdyń basqa da túrlerine aýysý kóp oqýshylardyń sabaǵyn jalǵastyrýǵa múmkindik bergenimen, birqatar máseleniń bar ekeni de anyqtaldy.
Bilim jáne ǵylym vıtse-mınıstri Sholpan Karınovanyń aıtýynsha, qashyqtan oqyǵan balalardyń bilimindegi olqylyqtar bıyl jáne kelesi oqý jylynda tolyqtyrylady.
Onyń sózinshe, qazir onyń ornyn qalaı toltyrý keregi týraly usynystar bar, soǵan baılanysty muǵalimder oqý josparyn daıyndaý kezinde kúrdeli taqyryptarǵa kóbirek toqtalady.
Bastaýysh bilim salasyndaǵy qyzmetterdiń jartysynan kóbin byltyrǵy jyldyń sońǵy toqsanynda orta kásiporyndar kórsetti (39,6 mlrd tg, bir jyl burynǵymen salystyrǵanda 44,9%-ǵa artyq), sondaı-aq, qyzmetterdiń 43%-y shaǵyn kásiporyndarǵa tıesili.
Negizgi jáne jalpy orta bilim berý salasynda orta kásiporyndar barlyq qyzmetterdiń 56%-yn kórsetti (205,9 mlrd tg, ósim jylyna – 31,9%), shaǵyn kásiporyndar — 38,1% (140,2 mlrd tg, jyldyq ósim – 38,4%.)
Óńirler boıynsha toqtalsaq, bastaýysh bilim berý salasyndaǵy kórsetiletin qyzmetterdiń eń kóp kólemi Túrkistan oblysyna tıesili boldy (15,9 mlrd tg, ósim jylyna 23,2%). Kóshbasshy óńirlerdiń úshtigine sondaı-aq Almaty (10,7 mlrd tg) jáne Jambyl oblysy (9,1 mlrd tg) kirdi.
Negizgi jáne jalpy orta bilim berý salasynda eń kóp qyzmet Almaty oblysynda kórsetildi (48,8 mlrd tg, ósim jylyna 34,7%). Odan keıin Túrkistan oblysy (39,8 mlrd tg) jáne Almaty (29,6 mlrd tg).
