QR BǴM bıylǵy oqý jylynyń qalaı bastalatynyn túsindirdi
NUR-SULTAN. QazAqparat - Mektep dırektorlary oqý jyly bastalar aldynda pedagogıkalyq keńester ótkizip jatyr. Onda bıylǵy oqý jylynyń erekshelikteri talqylanýda, dep habarlaıdy QazAqparat.
QR Bilim jáne ǵylym mınıstrliginiń baspasóz qyzmeti bergen málimetke qaraǵanda, qazir ár bilim berý uıymynyń basshysy ujymyna mektepte oqý jyly qalaı bastalatynyn, shtattyq rejımde oqıtyndar úshin qandaı sanıtarlyq qaýipsizdik sharalary qabyldanǵanyn, balalardy qashyqtan oqytý úshin mektep qandaı platformany tańdaǵanyn, baǵalaý júıesine qandaı ózgerister engizilgenin jáne oqý protsesin uıymdastyrýǵa qatysty ózge de saýaldar boıynsha túsindirý jumystaryn júrgizýde.
Qalyptasqan epıdemıologııalyq jaǵdaılarǵa baılanysty 2020-2021 oqý jyly qashyqtan bilim berý formatynda bastalady. Ata-analardyń qalaýy boıynsha mektepterde 1-4 synyp oqýshylary úshin kezekshi synyptar jumys isteıdi. Bir synypta bilim alýshylar sany 15-ten aspaıdy. Pedkeńes barysynda pedagogterge oqytý erejeleri men kezekshi synyptarda sanıtarlyq qaýipsizdikti qamtamasyz etý sharalary egjeı-tegjeıli túsindiriledi. Oqýshylar men pedagogterdiń temperatýrasy kúnde ólshenip, dene qyzýy normadan joǵary bolǵan jaǵdaıda jáne aýrý belgileri anyqtalsa, pedagogter jumysqa kirispeıdi, al oqýshylar úılerine qaıtarylady.
«Eger ata-analar nemese balalardyń zańdy ókilderi nıet bildirip, ótinish jazsa, al mektep sanıtarlyq normalardy qatań saqtaýǵa daıyn bolsa, bastaýysh synyp oqýshylary mektep qabyrǵasynda oqı alady. Mektepterde joǵary synyp oqýshylarynyń kabınetteri bos bolǵandyqtan, bul kabınetterdi de bastaýysh synyptardy oqytýdy uıymdastyrý úshin paıdalanýǵa bolady. Ata-analardyń ótinishterin synyp jetekshileri qoljetimdi baılanys quraldary arqyly onlaın-formatta qabyldaıdy», – dep atap ótti BǴM baspasóz qyzmeti.
Mektepterdegi kompıýterler balalarǵa ýaqytsha paıdalanýǵa beriledi. Sonymen qatar bilim basqarmalary, bólimderi qosymsha kompıýterler, noýtbýkter, planshetter satyp alyp, qabyldaý-tapsyrý aktileri negizinde oqýshylarǵa tapsyrady.
Árbir óńir, bilim berý uıymy qashyqtan oqytýdy uıymdastyratyn ınternet-platformany ózi tańdaıdy. Qashyqtan oqytý formaty aıasynda muǵalimder men oqýshylar platforma arqyly strımıng júıesin qoldanatyn bolady.
Sondaı-aq pedagogıkalyq keńeste muǵalimderge sabaqty uıymdastyrý boıynsha usynystar talqylanyp jatyr. Shalǵaıdaǵy aýyldyq eldi mekenderde ornalasqan shaǵyn jınaqty mektepterde kúndizgi formatta oqytýdy uıymdastyrý máselesi de nazardan tys qalmaıdy.
«Kún tártibindegi taǵy bir mańyzdy taqyryp – karantındik jáne shekteý sharalary jaǵdaıynda 2-11(12) synyptardaǵy oqýshylardyń oqý jetistikterin baǵalaý. Pedagogıkalyq keńesterde bilim alýshylardyń oqý jetistikterin baǵalaý júıesindegi ýaqytsha ózgerister talqylanyp jatyr»,-delingen QR Bilim jáne ǵylym mınıstrliginiń baspasóz málimetinde.
