QR BǴM basshysynyń depýtatqa aıtqan sózderinen qylmys quramy tabylǵan joq - QR ІІM
ASTANA. QazAqparat - Tergeý nátıjesi boıynsha QR Parlament Májilisiniń depýtaty Azat Perýashevtiń Bilim jáne ǵylym mınıstri Aslan Sárinjipovke qatysty jazǵan ótinishinde qylmys quramy tabylǵan joq.
Sondyqtan, osy is boıynsha sotqa deıingi óndiris toqtatyldy. Bul týraly QR Іshki ister mınıstrliginiń baspasóz qyzmeti resmı málimdep otyr.
«2015 jyldyń 5 maýsymynda Qazaqstan Respýblıkasy ІІM Tergeý departamentine Bas prokýratýradan Parlament Májilisiniń depýtaty A. Perýashevtiń QR Bilim jáne ǵylym mınıstri A.Sárinjipovtiń jeke menshik joǵary oqý oryndarynyń múddesin qorǵaý týraly aıtqan sózine qatysty jazbasha ótinishi kelip tústi. Osy faktige qatysty QR Qylmystyq kodeksi 376-babynyń 2-bóligi boıynsha (Qazaqstan Respýblıkasy Parlamenti depýtatynyń abyroıy men qadir-qasıetine qol suǵý jáne onyń qyzmetine kedergi jasaý) sotqa deıingi tergeý bastalǵan. Tergeý barysynda istiń jaǵdaıyn tekserýge qajetti tergeý amaldary, onyń ishinde tıisti saraptamalar júrgizildi.
Tergeý nátıjeleri boıynsha qylmys quramynyń bolmaýyna baılanysty is boıynsha sotqa deıingi óndiris toqtatyldy»,-dep habarlady ІІM baspasóz qyzmetinen.
Esterińizge sala keteıik, maýsym aıynyń basynda Parlamentte ótken otyrystardyń birinde depýtat Azat Perýashev pen Bilim mınıstri Aslan Sárinjipov bir-birin «túsinise almaı», sońynda depýtat mınıstrdiń ústinen quzyrly organdarǵa aryz túsirgen bolatyn.
