QR BǴM basshysy UBT úshin balalar men muǵalimderge qysym kórsetpeýge shaqyrdy
ASTANA. QazAqparat - UBT-ǵa baılanysty bilim berý bólimderi basshylary oqýshylar men muǵalimderge qysym kórsetpeýi tıis. Bul týraly búgin Astanada halyqqa esep berý kezdesýinde QR Bilim jáne ǵylym mınıstri Erlan Saǵadıev málim etti.
«Biz aldaǵy jyldan bastap mektep jáne kolledj túlekteri UBT tapsyrady dep josparlap otyrmyz. Ulttyq biryńǵaı testileýdiń mazmuny ózgeredi. Barsha damyǵan elderde sekildi ol fýnktsıonaldyq saýattylyqqa qaraı baǵyttalady. Test tapsyrý bir retpen ǵana shektelmeıdi. Sondyqtan da mektep dırektorlaryna, bilim basqarmalary men bólimderine aıtarym: UBT endi sizderdiń reıtıngterińizdiń bóligi bolmaıdy. Endi ol reıtıngterińizge áser etpeıdi. Sondyqtan, muǵalimder men oqýshylarǵa qysym kórsetpeýlerińizdi suraımyn. Joǵara oqý oryndary beretin jańa bilim aýqymyn ıgerýi úshin bizge fýnktsıonaldy saýatty bala kerek»,-dedi mınıstr.
