QR BǴM basshylyǵyn synaǵan Anar Qaıyrbekova JOO rektory bolyp taǵaıyndaldy

NUR-SULTAN. QazAqparat – QR Bilim jáne ǵylym mınıstrligi Ákimshilik jumys jáne memlekettik satyp alý departamentiniń dırektory bolǵan Anar Qaıyrbekova Ońtústik Qazaqstan memlekettik pedagogıkalyq ýnıversıtetiniń rektory bolyp taǵaıyndaldy, dep habarlaıdy QazAqparat tilshisi.

Bul taǵaıyndaýdy QR Bilim jáne ǵylym mınıstri Ashat Aımaǵambetov rastady.

«Bul, quqyqtyq alańda sheshiletin másele. Munda biliktilik talaptary bolady, sáıkes protsedýralar júrgiziledi. Eger protsedýralar barlyq talapqa saı bolsa, sheshim qabyldanady. Bul jaǵdaıda naqty sheshim qabyldandy. Muny men rastaımyn», - dep jaýap berdi mınıstr búgin Ortalyq kommýnıkatsııalar qyzmetinde tilshilerdiń suraǵyna.

Eske sala ketsek, tamyz aıynda QR BǴM Ákimshilik jumys jáne memlekettik satyp alý departamentiniń dırektory Anar Qaıyrbekova atalmysh vedomstvonyń jaýapty hatshysy Aryn Órsarıevti, vıtse-mınıstrler Rústem Bıǵarı men Fatıma Jaqypovalardy qyzmet kórsetý týraly kelisimge qol qoıýda jemqorlyqqa jol berdi dep aıyptaǵan bolatyn.

Aıyptaýlarǵa R.Bıǵarı jaýap berip, bul áreketti «medıabopsa» dep atady.

Al 12 qazanda Memleket basshysynyń Ókimimen A.Órsarıev QR Bilim jáne ǵylym mınıstrliginiń jaýapty hatshysy qyzmetinen bosatyldy.

Osy rette tilshiler mınıstrge: «Jaýapty hatshynyń ketýi QR BǴM departamentin basqarǵan Anar Qaıyrbekovanyń qyzmet kórsetý kelisimsharty týraly aıyptaýymen baılanysty ma?», - degen suraq qoıdy.

«Jaýapty hatshyǵa kelsek, eki oqıǵanyń bir-birimen baılanysty dep aıta almaımyn», - dedi A. Aımaǵambetov.