QR BǴM barlyq mektepterdi oqýlyqtarmen 25 tamyzǵa deıin qamtamasyz etpek
ASTANA. QazAqparat - Barlyq mektepter oqýlyqtarmen 25 tamyzǵa deıin qamtamasyz etiledi, dep habarlaıdy QR Bilim jáne ǵylym mınıstrliginiń baspasóz qyzmeti habarlady.
Mınıstrliktiń habarlaýynsha, bıyl birinshi synyptyń barlyq oqýshylary 5 kúndik oqytý júıesine kóshirilip, jańa baǵdarlamanyń negizinde bilim ala bastaıdy. Qalǵan synyptar bes kúndik oqý baǵdarlamasyna 2019 jylǵa deıin kezeń-kezeńimen kóshiriledi.
Eldegi mektepterde bilim berýdiń jańartylǵan baǵdarlamasyna kezeń-kezeńmen kóshý protsesi aıasynda 1-synyp úshin jańa oqýlyqtar jasaldy. Oqýlyqtar bes baspada shyǵaryldy:
«Almaty kitap baspasy» JShS - «Obýchenıe gramote», «Qazaq tili» (orys tildi mektepter úshin), «Rýsskıı ıazyk» (qazaq tildi mektepter úshin), «Mýzyka»;
«Atamura» Korporatsııasy» JShS - «Saýat ashý», «Kórkem eńbek»/«Hýdojestvennyı trýd»;
«Mektep» baspasy - «Matematıka», «Jaratylystaný»/«Estestvoznanıe», «Dúnıetaný»/»Poznanıe mıra»;
«Bóbek» ortalyǵy - «Ózin ózi taný»/«Samopoznanıe»;
«Express Publishing» JShS - «Anglııskıı ıazyk».
Jalpy, bıyl qyrkúıekte mektepke 380 265 bala birinshi synypqa barady.
Oqý jylynyń uzaqtyǵy mektepaldy synyptarda 32 aptaǵa, 1-synyptarda - 33 aptaǵa, 2-11 synyptarǵa - 34 aptaǵa sozylady.
Sonymen qatar mekteptegi demalys merzimderi de bekitildi. Kúzi demalys 7 kúnge (31 qazan men 6 qarasha aralyǵynda), qysqy 10 kúnge (30 jeltoqsannan 8 qańtarǵa deıin), kóktemgi demalys 13 kúnge (21 naýryzdan 2 sáýirge deıin) sozylady.
Sonymen qatar mektepaldy synyptyń jáne 1-synyp oqýshylary 2017 jyldyń 1 men 7 aqpan aralyǵynda 7 kún demalady.
Jazǵy demalystyń merzimi men onyń uzaqtyǵy QR BǴM-niń 2016/2017 oqý jylynyń aıaqtalýy týraly buıryǵynda kórsetiletin bolady.
