QR BǴM balabaqsha salyp jatqan bıznesmenderdi yntalandyrýǵa shaqyrdy
ASTANA. QazAqparat - QR BǴM elimizde balabaqshalar qurylysyna bıznesmenderdi yntalandyrýdyń sharalaryn daıarlady. Bul týraly búgin Astanada Qazaqstan bilim salasy qyzmetkerleriniń Respýblıkalyq tamyz keńesinde QR Bilim jáne ǵylym mınıstri Erlan Saǵadıev málim etti.
«Búgingi tamyz keńesi barshamyz úshin óte erekshe. Táýelsizdik alǵan jyldary bilim salasy birtalaı tabystarǵa qol jetkizdi. Úlken jáne mańyzdy jumystar atqaryldy. 450 memlekettik balabaqsha salyndy. Sonymen qatar jekemenshik balabaqshalar sany 10 ese ósip, ıaǵnı 2200-ge deıin jetti. Bul jeke ınvestıtsııanyń 100 mıllıard teńge qarjysy. «Balapan» baǵdarlamasynyń arqasynda 3-6 jastaǵy balalardy balabaqshamen qamtý 2,5 esege ósip, 82 paıyzdy qurady. Bıyl birinshi ret balabaqshalarda 400 myń orynǵa memlekettik tapsyrysqa qarjy bólindi», - dep toqtaldy mınıstr.
Sonymen qatar ol «Balapan» baǵdarlamasynyń arqasynda jeke sektor joǵary belsendilik tanytyp otyrǵanyna alǵysyn aıtty.
«Bıyl biz jańadan 30 myń orynǵa qosymsha 6 mlrd. teńgeden astam qarjy bólýdi suradyq, ıaǵnı bul negizinen jeke sektorda salynǵandar. Qurmetti Darıǵa Nursultanqyzy (QR vıtse-premeri), osy rette bizge qoldaý jasaýyńyzdy suraımyz. Qazir biz balabaqshalardy ashýǵa qarjy salǵan kásipkerlerge memlekettik tapsyrysty 1 jylǵa emes, odan kóp merzimge usyný boıynsha máseleni zertteýdemiz», - dedi E. Saǵadıev.
Onyń paıymynsha, bul memlekettik shara balabaqshalardy ashýǵa jeke ınvestıtsııalardy yntalandyra túsýge múmkindik beredi.
