QR BǴM: Arnaıy sanattaǵy oqýshylar tapsyrmalardy Qazposhta arqyly alady
NUR-SULTAN. QazAqparat - QR BǴM IV toqsanda qashyqtan oqytýdyń birneshe jolyn usynyp otyr. Atap aıtsaq, radıo jáne telearnalar arqyly ótkiziletin sabaqtar, bilim berý ınternet-resýrstaryn paıdalaný, shaǵyn jınaqty mektepterdegi dástúrli oqytý formaty jáne taǵy bir baǵyt – «Qazposhta» arqyly.
Búgin Bilim jáne ǵylym vıtse-mınıstri Rústem Bıǵarı men «Qazposhta» AQ Basqarma tóraǵasy Sáken Sársenov osy baǵyttaǵy yntymaqtastyq tetikterin talqylady, dep habarlaıdy QazAqparat QR Bilim jáne ǵylym mınıstrliginiń baspasóz qyzmetine silteme jasap.
Elimizdegi keıbir eldi mekenderde mektep te, ınternet te joq. Sondyqtan onda turatyn mektep jasyndaǵy balalar kórshi aýyldarǵa kólikpen arnaıy jetkizilip otyratyn. Endi pandemııa kezinde oqý materıaldaryn muǵalimderden oqýshylarǵa, oqýshylardan muǵalimderge keri jiberý jumystaryn uıymdastyrý qajet. Elimizde mundaı oqýshylardyń sany 20 myńnan asady.
Atalǵan mindetterdi júzege asyrý maqsatynda taraptar yntymaqtastyq týraly Memorandýmǵa qol qoıdy. Osyǵan sáıkes, oqýshylarǵa arnalǵan oqý materıaldary «Qazposhta» AQ poshta bólimsheleri arqyly jetkiziletin bolady. Ata-analarǵa poshta baılanysy qyzmeti úshin tólem jasaýdyń qajeti joq.
Qashyqtan bilim berý tehnologııalaryn qoldaný arqyly oqýǵa múmkindigi joq oqýshylar týraly derekterdi oblystyq jáne respýblıkalyq mańyzy bar qalalardyń bilim basqarmalarynyń ókilderi usynady.
«Aıta ketken jón, shalǵaı eldi mekenderde ómir súretin oqýshylarǵa arnalǵan oqý materıaldary sanıtarlyq qaýipsizdiktiń barlyq normalaryn saqtaı otyryp, jetkiziletin bolady»,-delingen habarlamada.
