QR BǴM: 173 muǵalim 2021 jyldyń «Úzdik pedagogi» ataǵyna úmitker
Aýqymdy baıqaýǵa qatysýshylar arasynda 132 mektepke deıingi jáne orta bilim berý, 41 tehnıkalyq jáne kásiptik bilim berý uıymynyń pedagogteri bar. Olardyń barlyǵy aýdandyq, qalalyq jáne oblystyq kezeńniń qorytyndysy boıynsha usynyldy.
«Ótken jyldan bastap konkýrsqa qatysý úshin ótinimder, materıaldar elektrondyq formatta qabyldanady. «Úzdik pedagog» ataǵyna bilim berý uıymdarynda jumys isteıtin jáne keminde bes jyl úzdiksiz pedagogıkalyq ótili bar muǵalimder úmitker bola alady. Konkýrs sheńberinde pedagogtiń bilim berýdi damytýǵa qosqan úlesi, pedagog qyzmetiniń nátıjeliligi jáne onyń kásibı sheberligi eskeriletin bolady», - dep atap ótti QR Bilim jáne ǵylym mınıstrligi Mektepke deıingi jáne orta bilim komıtetiniń tóraıymy Gúlmıra Kárimova.
Respýblıkalyq konkýrstyq komıssııanyń qazylar alqasynyń quramyna qoǵamdyq birlestikterdiń, úkimettik emes uıymdardyń, ata-analar qaýymdastyǵynyń, «Atameken» UKP ókilderi, jýrnalıster, belsendi pedagogter, Qazaqstandyq salalyq bilim jáne ǵylym qyzmetkerleri kásipodaǵynyń ókilderi jáne taǵy basqalar kirdi.
Aıta keteıik, «Úzdik pedagog» respýblıkalyq baıqaýy 2012 jyldan beri ótkizilip keledi. Osy ýaqyt ishinde konkýrs aıasynda 500-ge jýyq mektepke deıingi jáne orta, tehnıkalyq jáne kásiptik bilim berý uıymynyń pedagogi marapattaldy.
«Úzdik pedagog» ataǵynyń ıegerleri tósbelgi men 3 mln teńge (1000 AEK) kóleminde aqshalaı syıaqy alady.
Respýblıkalyq marapattan basqa, «Pedagog mártebesi týraly» Zań sheńberinde ákimdikter birjolǵy aqshalaı tólemderi bar jergilikti nagradalardy taǵaıyndady.
Mysaly, Pavlodar oblysynda oblystyq baıqaýdyń jeńimpazdary 300 AEK mólsherindegi syıaqyǵa ıe boldy. Shyǵys Qazaqstan oblysynda jergilikti bıýdjet qarajatynan 800 myń teńgeden astam syıaqy tabys etildi. Basqa da óńirlerde úzdik muǵalimder 300 AEK kóleminde birjolǵy aqshalaı syıaqy aldy.
