QR Baılanys jáne aqparat mınıstrligine baǵynyshty teleradıotaratý kásiporyndary qaıta qurylady
ASTANA. Shildeniń 7-si. QazAqparat /Gúlnara Jandaǵulova/ - QR Baılanys jáne aqparat mınıstrligi ózine baǵynyshty teleradıotaratý kásiporyndaryn qaıta qurady, dep habarlady mınıstr Asqar Jumaǵalıev óz blogynda.
«Shyndyǵynda da, Qazaqstan Respýblıkasynyń Baılanys jáne aqparat mınıstrligi teleradıotaratý júıesiniń barlyq qurylymyn qaıta uıymdastyrý máselesin oılastyrýda», - dep habarlady A.Jumaǵalıev óziniń blogyna kelip túsken suraqqa jaýap bere otyryp.
«Biz bul máseleniń mańyzdylyǵyn túsinemiz, sondyqtan atalmysh sharany júzege asyrý kezinde strategııalyq qatelikterdi boldyrmaý úshin quramyna Mınıstrliktiń, «Zerde» «Ulttyq ınfokommýnıkatsııalyq ortalyq» AQ, «Qazteleradıo» AQ, «Katelko» AQ jáne «Qazsatnet» AQ basshylary men mamandary engen jumys toby quryldy»», - dep naqtylady vedomstvo basshysy.
Onyń aıtýynsha, qaıta uıymdastyrýdyń maqsaty - «qandaı da bir kásiporyndy joıý emes, kerisinshe, joǵaryda atalǵan uıymdardyń materıaldyq-tehnıkalyq jáne adam resýrstaryn barynsha tıimdi paıdalaný».
Osymen qatar, dep sendirdi mınıstr, jańa kásiporynnyń kadrlyq quramy qaıta uıymdastyrylǵan kompanııanyń resýrstary negizinde qurylady.
