QR Baılanys jáne aqparat mınıstrligi tegin hostıng alatyn alǵashqy alty qazaqstandyq saıtty jarııalady
ASTANA. Maýsymnyń 4-i. QazAqparat /Gúlnara Jandaǵulova/ - Búgin Almatydaǵy Qaznetti damytý týraly ótken keńeste QR Baılanys jáne aqparat mınıstri Asqar Jumaǵalıev tegin hostıngke ıe bolǵan alǵashqy alty qazaqstandyq saıtty jarııalady, dep habarlaıdy mınıstrliktiń baspasóz qyzmeti.
Óz sózinde Asqar Jumaǵalıev Ǵalamtor jelisindegi qazaqstandyq segmenttiń damýy úshin atalmysh kezdesýdiń mańyzyn atap ótti. Mınıstrdiń aıtýynsha, «dál qazir osy salanyń maqsatty damý kezeńinde turǵandyǵynan jáne bıznes-orta úshin kommertsııalyq jaǵynan tartymdy bolyp otyrǵandyqtan, qazirgi tańda Qaznettiń damýy - mınıstrlik qyzmetiniń basym baǵyttarynyń biri bolyp otyr».
Kezdesý barysynda qazaqstandyq saıttardy qoldaý boıynsha memlekettik baǵdarlamanyń esebi tanystyryldy. Atalmysh baǵdarlamanyń maqsaty - tegin VPS (jeke vırtýaldy server) hostıng qyzmetin usyna otyryp, qazaqstandyq saıttardyń ıelerine qoldaý kórsetý. Sondaı-aq kezdesý barysynda baǵdarlamaǵa qatysý úshin belgilengen talaptarǵa saı resýrstar shaqyrylatyny aıtyldy. Olar: domendi zona (kz), saıttyń tili (orys, qazaq, aǵylshyn), kontent, jumys ýaqyty (úsh aıdan kem emes), statıstıka (saıtty aıyna 6000-nen kem emes kirý). Osymen qosa, qatysýǵa kompanııalardyń vızıtka-saıttary, úshinshi tulǵa tarapynan ınvestıtsııa alyp otyrǵan Internet-dúkender men resýrstar jiberilmeıtindigi aıtyldy.
Asqar Jumaǵalıev memlekettik qoldaýǵa ıe bolǵan alǵashqy alty saıtty atap ótti, olar: minber.kz, comport.kz, kzmz.kz, mama.kz, night.kz, uchi.kz jáne olardyń avtorlary men ıelerine tegin hostıng paıdalanýdyń sertıfıkatyn tapsyrdy.
