QR Baılanys jáne aqparat mınıstrligi óńirlik telearnalardy spýtnıktik sandyq toptamaǵa qosylýǵa shaqyrdy
ASTANA. 25 aqpan. QazAqparat /Jasulan Amanbaıuly/ - QR Baılanys jáne aqparat vıtse-mınıstri Nuraı Orazov aımaqtyq telearnalardy spýtnıktik sandyq toptamaǵa qosylýǵa shaqyrdy. Olar bıyldyń ózinde telearnalar arasynda ótetin baıqaýǵa usynym berip, toptama quramyna ornalasýǵa nıet tanyta alady.
«Búgingi tańda ulttyq spýtnıktik sandyq taratylym jelisinde rezervti oryndar bar. Bos oryndarǵa óńirlik telearnalar ıe bola alady»,-dep atap kórsetti N. Orazov búgin Qazaqstan Ulttyq teleradıohabar taratýshylar qaýymdastyǵynyń múshelerimen bolǵan kezdesýde. Onyń aıtýynsha, «baıqaýdyń negizgi talaby - qyzyqty ári sapaly kontent».
Eske sala keteıik, aǵymdaǵy jyldyń bas tusynda Memleket basshysy Nursultan Nazarbaev Ulttyq spýtnıktik sandyq teleradıo taratylym jelisin resmı túrde iske qosqan bolatyn. QR Parlamentiniń Májilis jáne Senat depýtattary, memlekettik organdardyń ókilderi jáne ÚEU-y múshelik etetin Qazaqstan Respýblıkasynyń teleradıohabar taratý jelisin damytý jónindegi komıssııa konkýrstyq usynymdardyń negizinde spýtnıktik sandyq toptamaǵa enetin teleradıo arnalardyń tizimin bekitti. Qazirgi ýaqytta testik rejımde kórsetilip jatqan tegin toptamaǵa 18 respýblıkalyq, 14 oblystyq telearna men 3 radıo jelisi engizilgen.
Telearnalar baıqaýǵa qatysý úshin ózderiniń tehnıkalyq jáne shyǵarmashylyq áleýetterin usyndy. Olardyń usynymdarynda satyp alynǵan, retranslıatsııalyq jáne tól baǵdarlamalardyń efırdegi araqatynasy týraly málimetter, habar taratylymyndaǵy til zańnamasynyń saqtalýy, sondaı-aq jabdyqtyq-stýdııalyq keshenderiniń tehnıkalyq sıpattamasy jónindegi aqparlar qamtyldy. Sonymen birge aqparattyq, taldamaly, pýblıtsıstıkalyq, jastar jáne balalarǵa arnalǵan, mýzykalyq jáne kórkem, derekti fılmder syndy ártúrli taqyryptaǵy baǵdarlamalary kórinis tapty.
