QR Baılanys jáne aqparat mınıstrligi elektrondyq sandyq qoltańba týraly jańa beınesıýjet ázirledi
ASTANA. 31 naýryz. QazAqparat - QR Baılanys jáne aqparat mınıstrligi elektrondyq sandyq qoltańba týraly jańa vıdeorolık ázirledi, ony alǵashqy bolyp ınternetti qoldanýshylar kóre alady.
«Sizder bul rolıkti alǵashqy bolyp tamashalaısyzdar. Teledıdarǵa ol tek birneshe aptadan keıin shyǵady. Eger siz elektrondyq sandyq qoltańbany almaǵan bolsańyz, beınesıýjetti kórgennen keıin siz ony mindetti túrde alasyz», dep jazǵan óziniń jeke blogynda QR Baılanys jáne aqparat mınıstri Asqar Jumaǵalıev.
Beınesıýjet «elektrondyq úkimet» baǵdarlamasyn odan ári júzege asyrý maqsatynda jasaldy. Onda elektrondyq sandyq qoltańbanyń ne ekendigi, ne úshin kerektigi jáne ony qalaı alýǵa bolatyndyǵy týraly aıtylady.
BAM-nyń málimeti boıynsha, osy kúnge deıin barlyǵy 486 945 elektrondyq qoltańba berildi.
