QR Baılanys jáne aqparat mınıstriniń tóraǵalyǵymen el aýmaǵynda teleradıohabarlardy taratýdy damytý máselesine arnalǵan komıssııa otyrysy ótti
ASTANA. 8 aqpan. QazAqparat - Búgin QR Baılanys jáne aqparat mınıstri Asqar Jumaǵalıevtiń tóraǵalyq etýimen Qazaqstan Respýblıkasynda tele-radıohabarlardy taratýdy damytý máselesine arnalǵan komıssııanyń otyrysy ótti.
|
Bul týraly vedomstvonyń baspasóz qyzmetinen habarlady. QR Úkimetiniń bekitken erejesine sáıkes, konkýrsta jeńip shyqqan otandyq tele-radıoarnalar óz habarlaryn respýblıkalyq bıýdjet esebinen taratý múmkindigine ıe bolady. Habar taratýdy jarǵylyq kapıtaly 100 paıyz memlekettiń qatysýymen baılanys operatory júzege asyrady. Tizimge enetin arnalardy Qazaqstan Respýblıkasynda teleradıo habarlaryn taratýdy damytý máselesi boıynsha QR Úkimeti qurǵan komıssııa anyqtaıdy. Atalǵan komıssııa quramyna QR Parlamentiniń depýtattary men memlekettik jáne úkimettik emes uıymdardyń ókilderi engen. Baıqaýǵa qatysýshy tele- radıoarnalar óz ótinimderimen birge, tehnıkalyq jáne shyǵarmashylyq múmkindikteri týraly derekter berdi. Atap aıtqanda - óz baǵdarlamalary men satyp alynatyn baǵdarlamalardyń arasalmaǵy, tildik tepe-teńdik, sondaı-aq, apparattyq-stýdııalyq keshenniń tehnıkalyq jaǵdaıy týraly. Ár túrli taqyryptaǵy baǵdarlamalar da usynyldy: aqparattyq, saraptamalyq, pýblıtsıstıkalyq, jastar men balalarǵa arnalǵan, mýzykalyq, kórkem jáne derekti fılmder jáne taǵy basqalar. Komıssııa otyrysy barysynda sondaı-aq, «Qazteleradıo»AQ-nyń Basqarma tóraǵasy Abaı Qadyralıevtiń Qazaqstan aýmaǵynda spýtnıktik sandyq habar taratýdy engizýge qatysty baıandamasy tyńdaldy. Esterińizge salaıyq, Ulttyq spýtnıktik teleradıotaratýdyń sandyq júıesi bıylǵy jyldyń 18 qańtarynda iske qosyldy. Joba Memleket basshysy Nursultan Nazarbaevtyń tapsyrmasy boıynsha jáne Qazaqstan Respýblıkasynyń 2020 jylǵa deıingi Strategııalyq damý josparyna saı júzege asyrylýda. Onyń basty alǵysharty shalǵaıdaǵy eldi-mekenderde aqparattyq teńsizdik deńgeıin tómendetýge baǵyttalǵan. |
