QR Básekelestikti qorǵaý agenttigine jańa basshy taǵaıyndaldy

ASTANA. 25 qańtar. QazAqparat - Búgin Astanada QR Premer-Mınıstri Serik Ahmetov QR Básekelestikti qorǵaý agenttiginiń ujymyna vedomstvonyń jańa basshysy Bolatbek Qýandyqovty tanystyrdy, dep habarlady Úkimet basshysynyń baspasóz qyzmetinen.

«B.Qýandyqov Ulttyq Bank júıesinde, ekonomıka jáne bıýdjettik josparlaý, tótenshe jaǵdaılar mınıstrlikterinde basshylyq qyzmetter atqardy. Qyzylorda oblysynyń ákimi boldy, óńirlerdiń jaǵdaıyn jaqsy biledi»,- dedi S.Ahmetov.

Úkimet Basshysy Agenttik aldyna elimizdiń Prezıdenti birqatar mańyzdy mindetter qoıyp otyrǵanyn atap kórsetti.

«Birinshiden, azyq-túlik taýarlarynyń baǵasy aıryqsha baqylaýda bolýy kerek. Bul áleýmettik mańyzdy másele, sondyqtan ákimdermen birlese otyryp, azyq-túlik baǵasynyń negizsiz kóterilýine jol bermeý qajet. Sonymen qatar, otyn, janar-jaǵar maı naryǵyndaǵy baǵa saıasaty muqııat qadaǵalanyp otyrýy tıis»,- dedi S.Ahmetov.

Sondaı-aq S.Ahmetov agenttiktiń burynǵy basshysy Ǵabıdolla Ábdirahymovqa jemisti eńbegi úshin alǵys aıtty.

Memleket Basshysynyń Jarlyǵymen Ǵ.Ábdirahymov Prezıdent Ákimshiligi Basshysynyń orynbasary bolyp taǵaıyndalǵany belgili.