QR Básekelestikti qorǵaý agenttigi qant baǵasynyń kóterilýi faktisi boıynsha iri qant jetkizýshiler men óndirýshilerge qatysty tergeý amaldaryn bastady

Bul týraly búgin Úkimet otyrysynda azyq-túlik taýarlarynyń aǵymdaǵy jaǵdaıy týraly baıandama jasaǵan atalǵan agenttiktiń basshysy Ǵabıdolla Ábdrahımov málim etti.

«Tolyqtaı alǵanda el aýmaǵynda qant baǵasy 11 paıyzǵa kóterildi. Bólshek naryq qatysýshylarynyń atap ótýinshe, oǵan onyń kóterme baǵasynyń artýy sebep bolǵan. Óz kezeginde qanttyń iri jetkizýshileri men óndirýshileri  bul ózgeristerdi Reseıdegi qant baǵasynyń ósimimen baılanystyryp otyr»,-  dedi ol.

Onyń atap ótýinshe, qant baǵasynyń qańtar-naýryz aılaryndaǵy eń joǵary ósimi Astana, Aqtóbe, Óskemen, Kókshetaý, Qaraǵandy, Shymkent, Almaty qalalarynda tirkelgen.

«Osyǵan oraı qazirgi ýaqytta agenttik tarapynan qant baǵasynyń kóterilýi faktisi boıynsha iri qant jetkizýshiler men óndirýshilerge qatysty tergeý amaldary bastaldy», - dedi Ǵ.Ábrahımov.

Bul oraıda QR Tótenshe jaǵdaılar mınıstri Vladımır Bojko óz qaramaǵyndaǵy turaqtandyrý qorynda 21924 tonna qanttyń bar ekendigin aıta kele: «baǵasy naryqtaǵy qaraǵanda aıtarlyqtaı tómen. Biz ony bastapqy baǵamen sata alamyz. Al Áleýmettik-kásipkerlik korporatsııalary qarjyny bıýdjetke qaıtarady», - dedi. Atalǵan bastamaǵa qoldaý bildirgen Úkimet basshysy K.Másimov bul baǵyttaǵy jumystardy úılestirýdi birinshi orynbasary Serik Ahmetovke júktedi. «Ruqsat beremin. Serik Nyǵmetuly osy baǵytta jumys isteńiz, sheshim qabyldaımyz», - dedi Premer-Mınıstr.