QR Básekelestikti qorǵaý agenttigi dári-dármek baǵasyna memlekettik retteýdi usyndy
ASTANA. 20 mamyr. QazAqparat - QR Básekelestikti qorǵaý agenttigi QR Densaýlyq saqtaý mınıstrligimen birlese dári-dármek baǵasyna memlekettik retteý engizý boıynsha usynystar paketin daıarlap jatyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte atalǵan agenttiktiń tóraǵasy Bolatbek Qýandyqov aıtty.
Onyń sózine qaraǵanda, jaqynda farmatsevtıka jáne medıtsına salalary naryǵyndaǵy básekelestik orta ahýalyna júrgizilgen taldaý birqatar problemalardy anyqtady. Onyń ishinde salada kóterme-deldaldardyń kóptep kezdesýi, aýyldyq jerlerde farmatsevtıkalyq naryqtyń damymaýy sekildi, sondaı-aq basqa da kemshilikter oryn alýda.
Taǵy bir problema dárilik zattarǵa baǵany negizsiz artyq qoıýǵa baılanysty. Osyǵan baılanysty agenttik iri farmatsevtıkalyq qaýymdastyqtardyń, kóterme-bólshek naryǵy sýbektileriniń ókilderimen tıisti keńes ótkizgen kórinedi.
«Keńes qorytyndysy boıynsha naryqta baǵany tómendetý men ónimsiz deldaldardy qysqartý maqsatynda agenttik Densaýlyq saqtaý mınıstrligimen birlese qazirgi kezde dárilik zattar baǵasyna memlekettik retteýdi engizý boıynsha usynystar daıarlaýda»,-dedi ol.
Belgili bolǵandaı, osy tektes taldaý munaı ónimderi men azyq-túlik naryqtaryna júrgizilgen eken. Onyń nátıjesi keıinirek usynylmaq.
