QR bas sanıtarlyq dárigeri jumys berýshilerge tumaýratqan qyzmetkerlerdi jumysqa jibermeýge keńes beredi
ASTANA. QazAqparat - QR bas sanıtarlyq dárigeri Jandarbek Bekshın jumys berýshilerge tumaýratqan qyzmetkerlerdi jumysqa kirgizbeýge keńes beredi. Mundaı málimdemeni ol búgin Ortalyq kommýnıkatsııalar qyzmetinde ótken baspasóz máslıhatynda málim etti.
«Kásiporyn basshylary tumaýratqan nemese Jedel respıratorlyq vırýstyq ınfektsııa (JRVI) belgileri bar qyzmetkerlerdi jumysqa kirgizbeýleri tıis», - deıdi J. Bekshın.
Onyń aıtýynsha, tumaýdyń aldyn alýdyń eń tıimdi joly - vaktsına alý.
«Biz jeltoqsan aıynyń ortasyna deıin vaktsına alyp qoıýǵa keńes beremiz. Eger aýrý sozylyp jatsa, qańtar aıynyń ortasyna deıin alýǵa bolady», - deıdi J. Bekshın.
Onyń sózi boıynsha, qazir qańtar aıynyń ortasy bolǵandyqtan, aýrý taralýy órshigen, sondyqtan tumaýdy juqtyryp almaýdyń amaldaryn jasaǵan jón.
«Vıtamınge toly tamaqtan kóp jegenińiz abzal. Lımon, pııaz, sarymsaqty, ıtmuryndy asqa jıi paıdalaný kerek. Sonymen qatar adam kóp jınalatyn oryndarǵa barmaýǵa, ásirese aýasy tar, jabyq jerlerden aýlaq bolǵan durys. Jóteli bar adamdardan alysyraq ornalasyp, olardan maska taǵýdy suraý kerek», - deıdi bas sanıtarlyq dáriger.
