QR Bas prokýrory: Joldardyń jaǵdaıy jol-kólik oqıǵalarymen tikeleı baılanysty

ASTANA. QazAqparat - Jol apattarynan qaza bolǵandardyń jartysynan astamy nemese 61 paıyzy eldi mekenderden tys aýmaqta oryn aldy. Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi Úılestirý keńesiniń jınalysynda QR Bas prokýrory Ashat Daýylbaev málim etti.

«Atap aıtqanda, jol apattarynan qaza bolǵandardyń jartysynan astamy nemese 61 paıyzy eldi mekenderden tys aýmaqty oryn alǵan jol-kólik oqıǵalaryna tıesili. Sondyqtan osy JKO-lar jol ınfraqurylymdaryndaǵy kemshilikterdi joıý boıynsha jáne jol qabatyn jaqsartý turǵysynda tıisti sharalardyń qabyldanbaýymen tikeleı baılanysty», - dedi Bas prokýror.

Aqmola, Jambyl, Qaraǵandy jáne Mańǵystaý oblystarynyń ákimdikteri eldi mekender men jaıaý júrginshiler oryndarynda tıisti baǵyttaýysh qorshaýlardy ornatý boıynsha salalyq baǵdarlamanyń sharalaryn oryndamaǵan.

«Qarapaıym jol belgileriniń bolmaýynan adamdar ajal qushýda. Máselen, Qaraǵandy oblysyndaǵy Shahtınsk qalasynda «negizgi jol» belgisiniń joqtyǵynan úsh kóliktiń qatysýymen oryn alǵan jol-kólik oqıǵasy saldarynan mototsıkl júrgizýshisi kóz jumdy. Osyndaı zań buzýshylyqtar elimizdiń barlyq óńirlerine qatysty bolyp otyr», - dep túıdi A.Daýylbaev