QR Bas prokýrory: Prokýratýra organdarynan óz erkimen ketkender saýatsyz nemese shıkiligi bar

ASTANA. QazAqparat - Ákesiniń aıtýymen qyzmetke kelgender naǵyz prokýror bola almaıdy. Bul týraly búgin «Prokýratýraǵa úzdik kadrlar!» dep atalatyn dóńgelek ústel barysynda QR Bas prokýrory Jaqyp Asanov málim etti.

«Jyl saıyn prokýratýra organdary shamamen 300 jas mamandy qabyldaıdy. Joǵary oqý oryndaryn jylyna 3 myń zańger bitirip shyǵarady. Júrgizilgen saýalnama olardyń shamamen 60 paıyzy bizde jumys istegisi keletindigin kórsetti. Demek, 1 orynǵa 60 adamnan keledi. bul basqa da úmitkerlerdi qospaǵandaǵy derek. Osy sandarǵa qaraǵanda bizge úzdikterdiń úzdigi ǵana iligýi tıis. Alaıda, shynaıy ómirde bulaı emes. Árıne, bizdiń qyzmetkerlerdiń kópshiligi kásibıler. Degenmen, daıyn emes, paıdakúnem, ákesiniń aıtýymen prokýror kásibin tańdaǵan adamdar da bolyp jatady. Mundaılar naǵyz prokýror bola almaıdy jáne olardyń qyzmeti qysqa ǵana», - dedi J.Asanov.

Onyń alǵa tartqan derekterine qaraǵanda, 2013-2015 jyldary aralyǵynda teris qylyqtary úshin jumys istegenine 3 jyl da tolmaǵan 10 jas qyzmetker jumystan bosatylǵan.

«Sońǵy úsh jylda prokýratýradan 67 jas maman ketti. Onyń 57-si óz erkimen jumystan bosady. Biraq, ashyǵyn aıtaıyn, bizden jaıdan jaı, óz erkimen ketetinderdiń qarasy az. Jumys óte mártebeli. Sondyqtan ózdiginen ketkenderdiń kópshiligi saýatsyz nemese shıkilikteri boldy», - dedi QR Bas prokýrory.