QR Bas prokýrory Qaırat Mámı jeke suraqtar boıynsha azamattardy qabyldady
ASTANA. Qazannyń 6-sy. QazAqparat - Qazannyń 5-i kúni QR Bas prokýrory Qaırat Mámı jeke suraqtar boıynsha azamattardy qabyldady. Kelýshilerdiń shaǵymdary negizinen zeınetkerlik zańnamalarǵa, turǵyn úıge menshik quqyǵyna, jalaqy, bereshek somalaryn óndirip alý sııaqty máseleler boıynsha sot aktilerine qatysty boldy,
dep habarlady Bas prokýrotýranyń baspasóz qyzmeti.
Bas Prokýror organnyń jaýapty qyzmetkerlerine árbir azamattyń aryzdarynyń dáıektigin muqııat zerdeleýdi, zańdylyqtyń buzylýy anyqtalǵan jaǵdaıda olardy joıý úshin túbegeıli sharalar qabyldaýdy, kináli adamdardy zań sheńberinde jaýapkershilikke tartýdy tapsyrdy.
Sondaı-aq Q.Mámı, úsh shaǵym boıynsha, zańdy kúshine engen sot aktilerin qaıta qaraý týraly narazylyqqa qol qoıdy. Endi olar Joǵarǵy sottyń qaraýyna joldanatyn bolady.
Atap aıtqanda, olardyń arasynda Astana qalasynyń barlyq turǵyndarynyń múddelerin qozǵaıtyn «Qalalyq elektr jelileri» AQ men «Astanaenergotaratý» JShS arasyndaǵy daý boıynsha sot aktileriniń kúshin joıý máselesi bar. Máselen, sot sheshimderi «Qalalyq elektr jelileri» AQ-nyń basqa abonentter tutynǵan elektr energııasynyń qunyn páter ıeleriniń esebine qosý týraly áreketin zańdastyryp bergen.
Másele qabyldanǵan jáne qoldanylǵan elektr qýatyn esepteıtin qurylǵynyń turǵyn úı aýmaǵynda emes, transformatorlyq kishi stansyda ornalasýy saldarynan týyndady. Nátıjesinde, «Qalalyq elektr jelileri» AQ jáne «Astanaenergotaratý» JShS usynǵan derekter boıynsha elektr energııasy kólemi arasynda is júzinde bolmaýy kerek aıyrmashylyq paıda bolǵan. Al bul aıyrmashylyqty tóleý páter ıelerine mindettelgen.
