QR Bas prokýrory Q.Mámı quqyq qorǵaý júıesin reformalaý týraly Elbasy Jarlyǵyna oraı jıyn ótkizdi
STANA. Tamyzdyń 20-sy. QazAqparat - Búgin Almatyda QR Bas prokýrory Qaırat Mámıdiń tóraǵalyǵymen Memleket basshysynyń «Qazaqstan Respýblıkasynda quqyq qorǵaý qyzmeti men sot júıesiniń tıimdiligin arttyrý jónindegi sharalar týraly» Jarlyǵynyń erejelerin júzege asyrý máselelerine arnalǵan jınalys ótti.
Bul aqparatty atalǵan vedomstvonyń baspasóz qyzmeti taratyp otyr.
Alqaly jıyn barysynda Bas prokýror aldaǵy jańartýdyń qazirgi ýaqyt talabyna saı ekenin atap kórsetip, qabyldanǵan Jarlyqtyń mazmuny ýákiletti organdardyń uıymdastyrýshylyq qurylymyn jetildirýge, olarǵa tán emes fýnktsııalardy alyp tastaýǵa jáne olardyń quziretin neǵurlym naqty bólýge, qyzmetkerlerdiń shtat sanyn ońtaılandyrýǵa, qylmystyq zańnamany yryqtandyrýǵa baǵyttalǵanyna basty nazar aýdardy. Sonymen qatar quqyq qorǵaý organdarynyń sharýashylyq júrgizýshi sýbektilerdiń qyzmetine negizsiz aralasý faktilerin boldyrmaý jáne baqylaý-qadaǵalaý fýnktsııalary bar memlekettik organdardy odan ári qysqartý túrinde bızneske qysym jasaýdy azaıtý sharalary qarastyrylǵandyǵyn atap ótti.
Reformaǵa sáıkes quqyq buzýshylyqtyń profılaktıkasy, qoǵamdyq qaýipsizdikti qamtamasyz etýdiń jaı-kúıine, sondaı-aq qylmystyq jazasyn ótegen adamdardy saýyqtyrý jáne ońaltý boıynsha atqarýshy bılik organdarynyń jaýapkershiligi edáýir arttyrylady. Quqyq qorǵaý organdary qyzmetkerleriniń jáne sottardyń jaýapkershiligi aıtarlyqtaı qataıtylady. Olardyń qyzmettik jaǵdaıyn paıdalana otyryp qylmys jasaýy jaza taǵaıyndaýda jazalaýdy aýyrlatatyn jaǵdaı retinde qabyldanatyn bolady.
«Bastalǵan reformanyń basym baǵyty qylmystyq zańnamany odan ári izgilendirý maqsatynda keıbir qylmystardy qylmystyq sıpattan aryltý bolyp tabylady. Qazirgi ýaqytta ondaǵan qylmys quramynyń ákimshilik óndiris salasyna aýystyrylatyn zań jobasyn daıyndaý jumystary júrgizilýde. Tutastaı alǵanda reformada josparlanǵan is-sharalar quqyq qorǵaý organdarynyń neǵurlym tıimdi uıymdastyrýshylyq-fýnktsıonaldyq qurylymyn jasap, quqyq qorǵaý qyzmeti men sot júıesiniń qarqyndy damýyn qamtamasyz etedi, sondaı-aq azamattardyń, qoǵam men memlekettiń quqyqtary men zańdy múddelerin barynsha qorǵaýǵa septigin tıgizetin bolady», delingen baspasóz habarlamasynda.
Vedomstvonyń atap ótýinshe, jınalys barysynda Almaty qalasy jáne Almaty oblysyndaǵy zańdylyqtyń jáne quqyq tártibiniń jaı-kúıi qarastyrylyp, qatysýshylar quqyq qorǵaý organdarynyń qyzmetindegi jekelegen kemshilikterdi atap kórsetken. Atap aıtqanda, qoǵamdyq oryndardaǵy aýyr qylmystardyń jasalý derekteriniń jıi oryn alýy, uıymdasqan qylmyspen kúrestegi sharalardyń jetkiliksizdigi, aldyn alý sharalarynyń tıimdiliginiń azdyǵy, tergeý jáne jedel-izdestirý qyzmeti sapasynyń tómendeýi, qoǵammen tyǵyz baılanystyń bolmaýyna nazar aýdaryldy.
Bas prokýror quqyq qorǵaý organdarynyń basshylarynan atqarýshy organdarmen birge Jarlyqtyń tıisinshe júzege asyrylýyn qamtamasyz etýdi, profılaktıkalyq jumystyń deńgeıin jáne uıymdasqan qylmyspen kúrestiń nátıjeliligin kóterýdi, azamattardyń, ásirese, bas bostandyǵynan aıyrý mekemelerinde ustalyp otyrǵan adamdardyń konstıtýtsııalyq quqyqtarynyń buzylýynyń árbir deregi boıynsha jedel yqpal etý sharalaryn qabyldaýdy, qoǵamdyq ınstıtýttarmen is-qımyl jasasýǵa jáne azamattarmen kezdesýge erekshe nazar aýdarýdy talap etti.
«Talqylaý qorytyndysy boıynsha qatysýshylar qarastyrylǵan máselelerdiń ózektiligin jáne quqyq qorǵaý organdarynyń qyzmetindegi oryn alǵan kemshilikterdi dereý joıý qajettiligin atap kórsetti», delingen baspasóz aqparatynda.
