QR Bas prokýrory abaqtyda otyrǵandardyń sany qanshaǵa qysqarǵandyǵyn aıtty

ASTANA. QazAqparat - Qazaqstan sottalyp, qamaýda otyrǵan adamdardyń sany boıynsha álemdik reıtıngte 30-dan 62-shi orynǵa tómendedi. Bul týral búgin QR Parlamenti Májilisinde qylmystyq-protsestik zańnamany odan ári jańǵyrtý taqyrybynda ótip jatqan parlamenttik tyńdaýda QR Bas prokýrory Jaqyp Asanov málim etti, dep habarlaıdy QazAqparat.

Bas prokýrar elimizdiń zańnamasyn izgilendirýdiń arqasynda qol jetkizilgen oń kórsetkishterge toqtaldy.

«Qylmystyq kodekstiń birinshi jáne basty jetistigine toqtalatyn bolsaq, onyń izgiligi aıtarlyqtaı artty, jazalaý  30 paıyzǵa tómendedi. Eger de ol retsıdıvıst bolsa, buryndary usaq urlyq úshin qamaýǵa otyrǵyzylatyn. Qazirgi kezde balamaly jazalaý túrleri kóbirek. Adamdar qoǵam men otbasynan oqshaýlanbaı, túzelý múmkindigine ıe»,-dedi J. Asanov.

Osy oraıda ol tórt jyl buryn Qazaqstanda «qamaýda otyrǵandardyń sanyn qysqartý boıynsha 10 qadam» jobasy bastalǵanyn eske salyp ótti.

«Nátıjesinde esh raqymshylyqsyz olardyń sany 30 paıyzǵa qysqardy, ıaǵnı 52-den 36 myńǵa deıin azaıdy. Álemdik túrme reıtınginde Qazaqstan 30-shy orynnan 62-shi orynǵa shyqty. Bul jetistikke retsıdıvti qylmystyń tómendeýine baılanysty qol jetkizildi»,-dedi Bas prokýror.