QR Bas prokýror Maqsat Úsenov pen Vasılıı Nı úkimderine pikir bildirdi
ASTANA. QazAqparat - QR Bas prokýrory Jaqyp Asanov adam ólimine alyp kelgen JKO jasaǵan Maqsat Úsenov pen «Qorǵas» ShYHO-nyń eks-prezıdenti Vasılıı Nıǵa qatysty úkimder boıynsha pikirin bildirdi, dep habarlaıdy QazAqparat.
«Eshqashan da birde-bir elde minsiz zań bolmaıdy, ómir zańdarǵa qaraǵanda parasatty, sebebi zańdar únemi kompromısster ónimi bolyp tabylady. Esterińizde bolsa, eki-úsh jyl buryn bireýdiń erkesi (Maqsat Úsenov) bir adamnyń ólimine alyp kelgen sumdyq jol-kólik oqıǵasyna sebep boldy. Zardap shegýshi tarap keshirim jasap, qylmystyq is toqtatyldy, al onyń nege toqtaǵanyn bilesizder me? Sebebi Qylmystyq kodekstiń 68 baby isti toqtatýdy mindetteıtin (taraptardyń biimge kelýi). Alaıda qoǵam munymen kelispedi, narazylyǵyn bildirdi. Nátıjesinde, Parlament 68 bapty ózgertti. Eger de bul jigit osyny búginde istese, ol mindetti túrde abaqtyǵa toǵytylar edi», - dedi Asanov Májilistegi jalpy otyrys barasynda tilshiler saýalyna jaýap bere otyryp.
Bas prokýror bul jaǵdaıdaǵy máseleler 68 bap pen 65 bapty qoldanýǵa qatysty bolǵanyn atap ótti.
«Bul turǵyda 65 bapqa da tıisti suraq týyndaıdy. Bul bap mán-jaıdy eskere otyryp, sotqa tıisti sheshim shyǵarýǵa quqyq beredi. Iá, sot ony kináli dep tanydy. Biraq sot zańmen qatar, ishki senimine súıenedi, ıaǵnı zań men ar-ojdandy qamtıdy. Bul óz kezeginde sottyń quqyǵy. Eshkim de sot zańdy buzdy dep aıta almaıdy. Sýdıa isti qarap, barlyǵyn tyńdaǵannan keıin osyndaı sheshim shyǵardy jáne 65 bapty qoldandy. Olar kináli dep tanyldy, bir jyldan az ýaqyt tergeý ızolıatorynda qamaýda (Nı) otyrdy. Aıyptaý úkimi bar, alaıda olar jazadan bosatyldy. Meniń jeke pikirime toqtalsam, ony men sheshpeımin, Parlament sheshedi. 65 bapty da ózgertýimiz qajet. Bul bap osy tektes qylmystarǵa qoldanylmaýy tıis dep sanaımyn», - dep atap ótti Bas prokýror.
Aıta keteıik, Qazaqstan Respýblıkasynyń Qylmystyq kodeksi 65 baby shynaıy ókinýine baılanysty qylmystyq jaýapkershilikten bosatýdy eskeredi.
