QR Bas prokýratýrasynyń alqasy qylmystyq qýdalaý organdarynyń azamattardyń bostandyqtary men konstıtýtsııalyq quqyqtarynyń saqtalýyn qadaǵalaý máselelerin qarady
ASTANA. Maýsymnyń 15-i. QazAqparat - Búgin Astanada Qazaqstan Respýblıkasy Bas prokýratýrasynyń kezekti alqa otyrysy ótip, onda qylmystyq úderiste qylmystyq qýdalaý organdarynyń azamattardyń bostandyqtary men konstıtýtsııalyq quqyqtarynyń saqtalýyn qadaǵalaý máseleleri, sondaı-aq, osy baǵyttaǵy prokýrorlyq qadaǵalaýdyń jaǵdaıy qaraldy, dep habarlaıdy vedomstvonyń baspasóz qyzmeti.
Alqa jumysyna Ulttyq qaýipsizdik komıteti, Іshki ister mınıstrligi, Ekonomıkalyq qylmyspen jáne sybaılas jemqorlyqpen kúres jónindegi agenttik pen ózge de vedomstvolardyń ókilderi qatysty.
Memleket basshysy bekitken quqyqtyq saıasat tujyrymdamasynda adamdar men azamattardyń bostandyqtary men konstıtýtsııalyq quqyqtarynyń saqtalýyn qamtamasyz etýdiń asa mańyzdy ekendigi basa aıtylǵan edi. Osyǵan oraı, olardyń ár kezde saqtalýy, sonyń ishinde, qylmystyq úderis aýqymynda saqtalýy prokýratýra organdarynyń úzdiksiz baqylaýynda bolyp otyr.
Otyrys barysynda, alqaǵa qatysýshylar qarastyrylyp otyrǵan máseleniń kókeıkestiligin atap kórsete otyryp, qylmystyq qýdalaýdy júzege asyratyn laýazymdy tulǵalar tarapynan bolyp qalatyn zańsyz is-áreketterdiń aldyn alýǵa baǵyttalǵan sharalardyń tıimdiligin arttyrýdyń mańyzdylyǵyn atap ótti. Jalpy alǵanda, osy baǵyttaǵy quzyretti organdardyń jumys deńgeıi qanaǵattanarlyq dep tanyldy. Sonymen qatar, kúdikti tulǵalardy ustaý kezindegi jiberilip jatqan óreskel zań buzýshylyqtarǵa jáne keıbir quqyq qorǵaý organdarynyń ishki qaýipsizdik qyzmetteriniń jumysynyń kemshilikterine basa nazar aýdaryldy.
Talqylaý nátıjeleri boıynsha, alqa otyrysy osy máselege baılanysty qylmystyq qýdalaý organdarynyń qyzmetin jetildirýge, jedel-izdestirý jáne protsessýaldyq is-sharalardy ótkizý kezinde zańdylyqtyń joǵary deńgeıli qamtamasyz etilýine, prokýrorlyq qadaǵalaý men vedomstvolyq baqylaýdy kúsheıtýge baǵyttalǵan sheshimder qabyldady.
