QR Bas Prokýratýrasynda Quqyq qorǵaý organdary Úılestirý Keńesiniń kezekti otyrysy boldy
ASTANA. 17 naýryz. QazAqparat -Búgin Bas Prokýror Qaırat Mámıdiń tóraǵalyq etýimen Quqyq qorǵaý organdary úılestirý keńesiniń kezekti otyrysy boldy, dep habarlaıdy QR Bas Prokýratýrasynyń baspasóz qyzmeti.
Keńes barysynda Qazaqstan Respýblıkasy Prezıdentiniń kezekten tys saılaýyn ótkizý barysynda zańdylyq pen quqyqtyq tártipti qamtamasyz etý máseleleri, sondaı-aq esirtki zattarynyń zańsyz aınalymyna qarsy áreket etý, qylmystyq qýdalaý organdaryna qylmystar týraly aryzdar men habarlamalardy elektrondy túrde tirkeýdi engizý (elektrondy AEK) máseleleri qaraldy.
Elimizdegi mańyzdy qoǵamdyq-saıası oqıǵa qarsańynda Bas Prokýror saılaý týraly zańnama talaptarynyń buljytpaı saqtalýyn qamtamasyz etýdi jáne azamattardyń saılaý quqyqtarynyń buzylý faktileri týraly shaǵymdarǵa jedel mán berýdi talap etti.
Úılestirý Keńesi esirtki satý jáne onyń kontrabandasymen kúreste quqyq qorǵaý organdarynyń ózara is-qımylyn kúsheıtýge, uıymdasqan qylmystyq toptardyń qyzmetine, onyń ishinde transulttyq uıymdasqan toptardyń qyzmetine tosqaýyl qoıýǵa baǵyttalǵan keshendi sharalar qabyldady.
Otyrysqa qatysýshylar jekelegen quqyq qorǵaý organdaryna engizilgen qylmystar týraly aryzdar men habarlamalardy elektrondy tirkeý júıesiniń joǵary nátıjeliligin jáne keleshegi bar ekendigin atap kórsetti. Osyǵan baılanysty, barlyq múddeli organdarǵa atalǵan ozyq jańalyqtardy engizý boıynsha shara qabyldaý usynyldy.
