QR Bas prokýratýrasynda BUU komıtetiniń azaptaýǵa qarsy usynystaryn júzege asyrý máseleleri qaraldy
ASTANA. 11 qarasha. QazAqparat - Búgin QR Bas Prokýrory Qaırat Mámıdiń tóraǵalyq etýimen Quqyq qorǵaý organdary Úılestirý keńesiniń kezekti otyrysy ótip,
onda BUU komıtetiniń azaptaýǵa qarsy usynystaryn júzege asyrý, sondaı-aq bas erkinen aıyrý oryndarynan bosatylǵan adamdardyń eńbek jáne turmystyq ornalasýy máseleleri qaraldy, dep habarlaıdy Qazaqstan Respýblıkasy Bas prokýratýrasynyń baspasóz qyzmeti.
Májiliske qatysýshylar BUU Komıtetiniń azaptaýǵa qarsy usynystaryn dáıekti júzege asyrý jónindegi atqarylǵan oń jumystardy atap ótti.
Sonymen birge Bas Prokýror azaptaýǵa jáne qataldyq pen jazalaýdyń basqa da osyndaı túrlerine qarsy kúres jóninde qosymsha sharalar qabyldaý qajettigine toqtaldy. Óńirlik prokýrorlarǵa azaptaý jáne qylmystyq protseske tartylǵan jáne arnaýly mekemelerdegi adamdarǵa qatal qaraýǵa baılanysty basqa da zańsyz ádister týraly aryz-shaǵymdardy tekserýdi qatań baqylaý tapsyryldy.
Bas bostandyǵynan aıyrý oryndarynan bosatylǵan adamdardyń áleýmettik beıimdelýin talqylaý barysynda májiliste bul jumystyń tıimdiligin arttyrý, ýákiletti memlekettik organdardyń burynǵy qamaýdaǵylardyń eńbek jáne turmystyq jaǵynan ornalasýy jóninde ózara is-qımylyn jumyldyrý jáne tıisinshe uıymdastyrý, olardyń quqyqtaryn qorǵaý salasynda zańdylyqtyń saqtalýyna prokýrorlyq qadaǵalaýdy kúsheıtý jóninde keshendi sharalar qabyldaýdyń ózektiligi atap ótildi. Halyqaralyq tájirıbeni esepke ala otyryp bul salada jumystyń jańa nysandary men ádisterin engizý usynyldy.
Sondaı-aq, májiliste Úılestirý keńesiniń 2011 jyldyń birinshi jartyjyldyǵyna arnalǵan jumys jospary maquldandy.
