QR Bas prokýratýrasyna arzan tehnıka jetkizip bergen kásipker sottaldy

ASTANA. QazAqparat -QR Bas prokýratýrasyna memlekettik tapsyrysqa saı emes tehnıkalardy ákelip bergen kásipkerge qatysty sot úkimi shyqty, dep habarlaıdy «QazAqparat» HAA tilshisi.

Astana qalasy Esil aýdandandyq №2 sotynda qaralǵan sot isiniń materıaldaryna sáıkes, «Zerek KZ» JShS dırektory eldiń basty qadaǵalaýshy organynyń janyndaǵy materıaldyq-tehnıkalyq qamtý basqarmasyn (MTQB) aldap, tehnıkalyq erekshelikteri saı kelmeıtin noýtbýktar men júıeli bloktardy ákelip bergen.

Habarlanǵanyndaı, Jomart Káribaı basqarmanyń ınspektorymen arzan kompıýterlik tehnıka tabatyny týraly kelisip alǵan.

«MTQB júrgizgen memlekettik satyp alýlardyń nátıjesine sáıkes 200 júıeli blokty jetkizý boıynsha kelisim bekitilgen. 2016 jyldyń 12 maýsymynda kelisimge qosymsha sharttar negizinde tasymaldyń jalpy quny 47 mıllıon 511 myń teńgeniń 300 júıeli blogyna artqan», - delingen is materıaldarynda.

Aqyr sońynda sottalýshy MTQB-ǵa tehnıkalyq erekshelikteri saı kelmeıtin 40 noýtbýk pen 300 júıeli blok ákelip, MTQB-nyń qabyldaý-tapsyrý qujaty boıynsha ótkizgen. Osynyń saldarynan Bas prokýratýraǵa jalpy quny 17 mıllıon 129 myń 680 teńgeniń shyǵyny keltirilgen.

Sot Jomart Káribaıdy «iri kólemdegi alaıaqtyq» baby boıynsha kináli dep taýyp, ony shartty túrde 3 jyl 9 aı merzimge bas bostandyǵynan shektedi. Ol sonymen birge memlekettik satyp alý salasynda 3 jyl merzimge eńbek etý quqyǵynan aıyryldy.