QR Bas prokýratýrasy janyndaǵy Zańdylyqty qamtamasyz etý jónindegi qoǵamdyq keńestiń kezekti májilisi ótti
ASTANA. Mamyrdyń 31-i. QazAqparat - Búgin elimizdiń Bas prokýrorynyń birinshi orynbasary I.Merkeldiń tóraǵalyǵymen QR Bas prokýratýrasy janyndaǵy Zańdylyqty qamtamasyz etý jónindegi qoǵamdyq keńestiń kezekti májilisi bolyp, onda joǵary qadaǵalaý organdaryndaǵy azamattardyń ótinishterin qaraýdyń jaı-kúıi talqylandy.
Bul týraly atalǵan vedomstvonyń baspasóz qyzmetinen habarlap otyr.
Keńestiń jumysyna Parlament depýtattary, elimizdiń kórnekti ǵalymdary, «Nur Otan» halyqtyq demokratııalyq partııasynyń, buqaralyq aqparat quraldarynyń ókilderi qatysqan.
«Azamattardyń memlekettik organdarǵa, onyń ishinde quqyq qorǵaý organdaryna bergen ótinishteri olardy qorǵaýdyń konstıtýtsııalyq kepildigin júzege asyrýdyń quraly, buzylǵan quqyqtaryn qorǵap, qalpyna keltirýdiń tásili bolyp tabylady. Osyǵan oraı, prokýratýra organdarynyń ashyqtyǵy men qol jetimdiligin qamtamasyz etý olardyń qyzmetiniń basym baǵyttarynyń biri bolyp otyr», delingen baspasóz habarlamasynda.
Vedomstvonyń taratqan aqparatyna qaraǵanda, qadaǵalaý organdaryna kelip túsip jatqan ótinishter sany jyl saıyn ósip otyr. Mysaly, ótken jyly ǵana 220 myńǵa jýyq ótinishter kelip túsken, bul 2008 jylǵy kórsetkishten 22,9 paıyzǵa artyq.
Árbir ótinish boıynsha azamattardyń quqyqtarynyń buzylýynyń jolyn kesýge jáne zańdy múddelerin qorǵaýǵa nemese qalpyna keltirýge baǵyttalǵan prokýrorlyq yqpal etý sharalary mindetti túrde qoldanylady. «Máselen, ótken jyly prokýrorlar bes myńnan astam prokýrorlyq qadaǵalaý aktisin engizip, eki jarym myńnan astam adamdy ártúrli jaýapkershilikke tartty, ondaǵan myń jeke jáne zańdy tulǵalardyń quqyqtary qalpyna keltirildi», dep naqtylaı túsedi baspasóz qyzmeti.
Májiliske qatysýshylar qaralyp otyrǵan máseleniń ózektiligin jáne kelip túsken ótinishterdi qaraý, olardy qaraýdy jedeldetýdi arttyrý, sondaı-aq yqpal etýdiń qajetti sharalaryn qabyldaý jónindegi jumystardy odan ári jetildirýdiń mańyzdylyǵyn atap kórsetken. Talqylaý qorytyndysy boıynsha, keńes osy másele jónindegi prokýratýra organdarynyń qyzmetin odan ári jetildiretin usynystar qabyldaǵan.
