QR Bas prokýratýrasy jalǵan aqparat taratqandarǵa jaýapkershilikti kúsheıtýge nıetti - N. Súıindikov
ASTANA. QazAqparat - QR Bas prokýratýrasy jalǵan aqparat taratqandarǵa jaýapkershilikti kúsheıtpek. Bul týraly búgin QR Bas prokýratýrasynyń resmı ókili Nurdáýlet Súıindikov málim etti.
«Biz Parlamentke eleýli zııan men aýyr saldarǵa ákelýi múmkin jalǵan aqparatty taratqandarǵa qylmystyq jaýapkershilikti kúsheıtý jóninde usynystar engizdik. Osyǵan baılanysty Bas prokýratýra azamattarǵa, BAQ ókilderine shyndyqqa sáıkes kelmeıtin aqparatty taratýdan bas tarta otyryp, bul máselelerge neǵurlym jaýapkershilikpen qaraý týraly ótinish jasaıdy», - dedi resmı ókil.
Aıta keteıik, sońǵy kúnderi ár túrli kommýnıkatsııa quraldary arqyly (áleýmettik jelilerdi qosa alǵanda ınternet-habarlamalar, SMS) «Tsentr Kredıt» Banki, «Kaspıı Banki» jáne «Alıans bankiniń» bankrot bolý múmkindigi týraly aqparat tarala bastaǵany málim.
Osy oraıda búginge deıin bankterdiń qarjylyq ahýaly týraly jalǵan aqparattyń alǵash taratylýyna qatysy bar birneshe adam anyqtalyp, ustaldy. Ol adamdar istegenderin moıyndap, tıisti túrde jaýap berýde jáne mundaı áreketterge barýlarynyń jaı-japsary jaıynda egjeı-tegjeıli baıandap berdi. Olardyń arasynda almatylyq zań kompanııalarynyń biriniń qyzmetkerleri men bank zańgeri bar kórinedi. «Olardyń jaýaptary basqa anyqtalǵan jáne ustalǵan adamdardyń túsiniktemeleri sııaqty muqııat tekserilýde», - dedi N. Súıindikov.
Belgili bolǵandaı, istiń mán-jaıyna qaraı ákimshilik jáne qylmystyq jaýapkerlshilik týraly másele sheshiletin bolady.
