QR Bas prokýratýrasy vedomstvo atynan alaıaqtar jalǵan hattar joldap otyrǵanyn málimdedi

ASTANA. QazAqparat - Quqyq qorǵaý organdary anyqtaǵandaı, aǵymdaǵy jyldyń 26 naýryzynan bastap ártúrli elektrondyq poshtalardan ([e-mail], [e-mail] jáne t.b.) Bas prokýratýranyń atynan alaıaqtar jalǵan hattar joldap otyrǵan.

Bul týraly QR Bas prokýratýrasynyń baspasóz qyzmeti habarlady.

Áńgime myna mazmundaǵy hattar jóninde bolyp otyr: «Sizge Qazaqstan Respýblıkasy Bas prokýratýrasynyń 18.03.2015 j. №530491 alaıaqtyq boıynsha qozǵalǵan qylmystyq is boıynsha tergeý nátıjeleri týraly aqparattyń kóshirmesin joldaımyn. Qosymsha: 4-paraqta».

"Osyǵan oraı, Qazaqstan Respýblıkasy Bas prokýratýrasynyń mundaı hatty daıyndamaǵanyn jáne taratpaǵanyn habarlaımyz. Aqparat taratylǵan elektrondyq poshtalar prokýratýra organdaryna tıesili emes", - delingen habarlamada. .

Mundaı hattardy alǵan jaǵdaıda olardy ashpaýǵa keńes beriledi, óıtkeni olardy alaıaqtar qylmystyq maqsattarda paıdalanyp otyr. Sondaı-aq faıldarda kompıýter ıesiniń málimetter bazasyn basqarýǵa múmkindik beretin zııandy baǵdarlamalar bolýy múmkin.

Sondyqtan Bas prokýratýra azamattarǵa muqııat bolýdy jáne alaıaqtardyń arbaýyna túsip qalmaýdy suraıdy. Osyndaı hattar kelgen jaǵdaıda Bas prokýratýranyń senim telefonyna qońyraý soǵý qajet - 8 [phone] .

Qazirgi ýaqytta osy derek boıynsha tekseris júrgizilýde.