QR Bas prokýratýrasy saılaýdy uıymdastyrý jáne ótkizý kezeńinde zańnamanyń birkelki qoldanylýyn qadaǵalap otyr
Búgingi kúnge saılaý komıssııalary nemese memlekettik organdar tarapynan qandaı da bir buzýshylyqtar tirkelgen joq. Tek qana saılaý aldyndaǵy úgitti ótkizý, sondaı-aq qoǵamdyq pikirge suraý salý nátıjelerin jarııalaý sharttarynyń jekelegen buzýshylyqtary oryn alǵan, olar boıynsha aldyn alý sıpatyndaǵy sharalar qabyldandy. Jalpy, saılaý qarsańyndaǵy kúnge, úgitteýdi qosa alǵanda, barlyq is-sharalar «Qazaqstan Respýblıkasyndaǵy saılaý týraly» Qazaqstan Respýblıkasy Konstıtýtsııalyq zańynyń (budan ári - Konstıtýtsııalyq zań) talaptaryna sáıkes ótkizildi. Degenmen, saılaý qarsańyndaǵy, sondaı-aq saılaý kúni quqyq buzýshylyqtardyń aldyn alý maqsatynda saılaý protsesiniń barlyq qatysýshylarynyń nazaryn zańnamanyń kelesi normalaryna aýdaramyz. Konstıtýtsııalyq zańnyń 27-babynyń 2-tarmaǵyna sáıkes, úgit-nasıhat saılaý bolatyn kúnniń aldyndaǵy kúngi jergilikti ýaqyt boıynsha, ıaǵnı, 2015 jylǵy 24 sáýirdegi 00.00 saǵatta aıaqtalady. Saılaý bolatyn kúni jáne onyń qarsańyndaǵy kúni kez kelgen úgitke tyıym salynady (Konstıtýtsııalyq zańnyń 32-baby). Bul rette, saılaý komıssııalarynyń úı-jaılarynan jáne daýys berýge arnalǵan úı-jaılardan tys jerlerde burynnan ilýli turǵan baspa úgit materıaldaryn sol oryndarynda qaldyrýǵa bolady. Daýys beriletin kún aldyndaǵy bes kún ishinde jáne daýys beriletin kúni buqaralyq aqparat quraldarynda qoǵamdyq pikirge suraý salý nátıjelerin, saılaý nátıjeleriniń boljamyn, saılaýǵa baılanysty ózge de zertteýlerdi jarııalaýǵa jol berilmeıdi. Saılaý kúni daýys beriletin úı-jaıda nemese daýys berý pýnktinde qoǵamdyq pikirge suraý salýǵa tyıym salynady (Konstıtýtsııalyq zańnyń 28-babynyń 9-tarmaǵy). Konstıtýtsııalyq zańnyń 39-babynyń 2-tarmaǵyna saı daýys berýge arnalǵan úı-jaıdaǵy adamdar daýys berýdi ótkizý jónindegi komıssııa belgilegen erejelerdi qatań saqtaýǵa mindetti. Tıisti saılaý komıssııasynyń tóraǵasy tártipke jaýapty bolady jáne Konstıtýtsııalyq zańnyń erejelerin buzyp, daýys berýdi ótkizýge kedergi keltirgen kez-kelgen adamnyń ol jerden ketýin talap etýge quqyly. Daýys berý kúni daýys berýge arnalǵan úı-jaıda saılaý protsesine qatysy joq bógde adamdardyń bolýyna tyıym salynady.
