QR Bas prokýratýrasy Rahat Álıevke qatysty qylmystyq isti toqtatady
Agenttik tilshisiniń resmı saýalyna jaýap bergen Bas prokýratýranyń málimetine súıensek, quzyrly organ Rahat Álıevtiń ólimi jarııalanǵan 2015 jyldyń 25 aqpanynan beri qylmystyq isti toqtatýǵa qajetti tıisti qujattardy suratqan. Avstrııanyń tıisti organdaryna halyqaralyq tergeý buıryǵy jóneltilip, bıznesmenniń ólimi týraly kýálik, sot-medıtsınalyq saraptamalardyń qorytyndysy, hattamalar jáne ólikti anyqtaıtyn qujattar suratylǵan.
«Bas prokýratýra osy saýaldaryna jaýap retinde 2015 jyldyń 20 sáýirinde tek qana Rahat Álıevtiń ólimi týraly kýáliktiń kóshirmesin ala aldy. 2016 jyldyń 13 aqpanynda Bas prokýratýra Avstrııaǵa taǵy da saýal joldady. Avstrııa bıligi ekinshi márte jóneltilgen suraýǵa 2016 jyldyń 30 maýsymynda jaýap bere otyryp, kýálikten basqa qujat bere almaıtyndaryn aıtty. Sebebi, Rahat Álıevtiń jesiri E.Shorazova 2015 jyldyń 18 maýsymynda Venanyń jer sotyna Rahat Álıevtiń ólimine qatysty qujattardy Qazaqstan tarapyna bermeý týraly qarsylyq jiberip qoıǵan», - dep habarlady saýalymyzǵa jaýap bergen Bas prokýratýra.
Alaıda, Vena soty Elnara Shorazovanyń ótinishin qabyldamady. 2016 jyldyń 21 qarashasynda Qazaqstannyń Bas prokýratýrasy dıplomatııalyq kanaldardyń kómegimen Rahat Álıevtiń ólimi týraly apostıldi kýáliktiń, 2015 jyldyń 9 naýryzynda Shveıtsarııanyń Sankt-Gallen qalasyndaǵy Sot medıtsına ınstıtýty júrgizgen sot-medıtsınalyq saraptamalardyń kóshirmesin alǵan.
«Osy qujattar Rahat Álıevtiń ólimine baılanysty, oǵan qatysty qozǵalǵan qylmystyq isti toqtatý úshin tergeý organdaryna jóneltildi»,- dep habarlady Bas prokýratýra.
