QR Bas prokýratýrasy men onyń barlyq qurylymdary BAQ materıaldaryna kúndelikti monıtorıng júrgizip otyrady
ALMATY. Jeltoqsannyń 7-si. QazAqparat /Erbol Azanbek/ - QR Bas prokýratýrasy men onyń barlyq qurylymdary BAQ-yna kúndelikti monıtorıng júrgizip otyrady.
Bul týraly búgin Almatyda ótken «Qazaqstandyq BAQ jáne tulǵanyń erkindigi men quqyǵyn qorǵaý» atty ǵylymı-tájirıbelik konferentsııa barysynda QR Bas prokýrory baspasóz hatshysynyń aǵa kómekshisi Narıman Beknazarov aıtty, dep habarlaıdy QazAqparat.
«Monıtorıng barysynda barlyq basylymdar, ınternet-resýrstar, telearnalardaǵy jańalyqtar qaralady. Olardyń negizinde aqparattyq jarshy jasalady. Oǵan kúndegi negizgi jańalyqtar, túrli organdar men olardyń qyzmetkerleriniń jumysy, azamattardyń quqyqtary men erkindigin shekteýge arnalǵan aqparattar engiziledi», deıdi N.Beknazarov.
Onyń aıtýynsha, baspasóz qyzmeti QR Bas prokýratýrasynyń qurylymdyq bólimi retinde azamattardyń quqyǵy men erkindigin shekteýge baılanysty zańsyz áreketterge der kezinde jedel sharalar qabyldaýǵa yqpal etedi. «BAQ-yndaǵy jarııalanymdar Bas prokýratýra men onyń qurylymdyq bólimderiniń basshylaryna jetkiziledi. Odan ári tıisti sheshimder qabyldaný úshin jiberiledi. Bunyń negizinde arnaıy baqylaý kartalary júrgizilip, oryndalýy qadaǵalanady. Osy baǵyt boıynsha baspasóz qyzmeti BAQ-ynda jarııalanǵan azamattardyń quqyǵy men erkindiginiń buzylýyna arnalǵan materıaldar boıynsha zańsyzdyqtyń aldyn alýǵa umtylady», deıdi Bas prokýratýra ókili.
