QR Bas prokýratýrasy qylmystyq-protsessýaldyq kodekstiń jańa redaktsııasyn tanystyrdy
ASTANA. 26 maýsym. QazAqparat - Búgin QR Bas prokýrorynyń orynbasary Iogann Merkeldiń tóraǵalyǵymen ótken qoǵamdyq keńestiń otyrysynda elimizdiń qylmystyq-protsessýaldyq kodeksiniń jańa redaktsııasy tanystyryldy.
Qazaq gýmanıtarlyq zań ýnıversıtetiniń rektory Marat Qoǵamovtyń atap ótýinshe, atalǵan kodekstiń tıisti tujyrymdamasy da ázirlengen. Onda qylmystyq protsess tájirıbesine engizý josparlanyp otyrǵan 10-nan astam eleýli jańalyq bar.
«Bul tergeýshiniń, prokýrordyń, sottyń jumysyna qatysty. Bul rettegi saıasat istiń barynsha shuǵyl arada tergelip, ashylýy jáne sotqa jiberilýi aıasynda toǵysady», - dedi ol.
Rektordyń sózine qaraǵanda, kodekstiń jańa redaktsııasynda birqatar dástúrli ınstıtýttar alynatyn bolady. Máselen, tergeý aldy tekserý sharalary bolmaıdy, qylmys týraly aryz túsken betten-aq tergeý amaldary bastalady. Prokýrordyń ókilettiligine barynsha basymdyq berilip, qylmystyq istiń sottyń aldyna jyldam jetýi soǵan táýeldi bolady.
«Belgili bir baqylaýdyń bolýy úshin tergeý sottary ınstıtýty da engiziledi. Olar sotqa deıingi aralyqta týyndaıtyn barlyq máselelerdi sheshetin bolady. Sot qyzmetiniń kepildik deńgeıi de kúsheıtiledi. Óıtkeni sot protsesterin mundaı jedel tergeý nátıjesinde ol barynsha turaqty ári ashyq bolady», - dedi M.Qoǵamov.
