QR Bas prokýratýrasy qazaqstandyqtardyń Sırııadaǵy soǵys qımyldaryna qatysýy týraly beınerolıkti taratýǵa tyıym saldy
«2014 jylǵy 22 qarashada Internet jelisinde Sırııa aýmaǵynda júrgen jáne terrorıstik uıymdar jaǵynda soǵys qımyldaryna qatysyp jatqan qazaqstandyq azamattar kórsetilgen beınerolık («Igi isterde saıysqa túsińder») taratyla bastady. Ony zerdeleý rolıktiń mazmuny lańkestik áreketke qatysýdy nasıhattaýǵa jáne aqtaýǵa baǵyttalǵanyn kórsetti», - delingen QR Bas prokýratýrasynyń habarlamasynda.
«Buqaralyq aqparat quraldary týraly» Qazaqstan Respýblıkasy Zańynyń 2-babynyń 3-tarmaǵyna saı terrorızmdi nasıhattaýǵa jáne aqtaýǵa jol berilmeıdi. «Terrorızmge qarsy is-qımyl týraly» Qazaqstan Respýblıkasy Zańynyń 10-babyna sáıkes terrorızmdi nasıhattaýǵa tyıym salynǵan.
Osyǵan baılanysty Bas prokýratýra «Baılanys týraly» Zańnyń 41-1-babynyń negizinde 2014 jylǵy 22 qarashada Qazaqstan Respýblıkasy Investıtsııalar jáne damý mınıstrliginiń Baılanys, aqparattandyrý jáne aqparat komıtetine atalǵan rolıkke kirýdi oqshaýlaý, sondaı-aq ony sot tártibinde zańsyz dep taný jáne Qazaqstan aýmaǵynda taratýǵa tyıym salý jóninde sharalar qabyldaý týraly uıǵarym engizdi.
«Deıturǵanymen, jekelegen jeke jáne zańdy tulǵalar, sondaı-aq buqaralyq aqparat quraldary baılanys quraldaryn jáne jelilerin paıdalana otyryp, qarastyrylyp jatqan quqyqqa qaıshy beınematerıaldy taratýdy jalǵastyrýda. Osyǵan baılanysty, quqyqtyq saldarlardyń týyndaýyn boldyrmaý úshin Bas prokýratýra joǵaryda keltirilgen zańdardyń normalaryn qatań saqtaý qajettigin eskertedi jáne joǵaryda atalǵan rolıkti nemese onyń jekelegen epızodtaryn taratýdan bas tartýdy usynady», - delingen habarlamada.
