QR Bas prokýratýrasy Facebook, Twitter jáne LiveJournal ınternet-portaldaryna aryzben júgingendigin joqqa shyǵardy
ASTANA. 23 qarasha. QazAqparat - Qazaqstan Prokýratýrasy Facebook, Twitter jáne LiveJournal ınternet-portaldaryna qatysty sotqa aryzben júgingendigi jónindegi aqparat shyndyqqa janaspaıdy jáne ashyq arandatýshylyq sıpatta jasalǵan.
Bul týraly búgin QazAqparat tilshisine QR Bas prokýratýrasynyń resmı ókili Nurdáýlet Súıindikov málim etti.
«Almaty qalasynyń prokýratýrasy bergen aryzda tek «Respýblıka», «Vzglıad», «Stan TV» beıneportaly men «K+» telearnasyn ekstremıstik dep taný jáne olardyń Qazaqstan Respýblıkasy aýmaǵynda taratylýyna tyıym salý talaby jóninde aıtylǵan», - dedi ol.
«Aqparat quraldarynda aıtylǵan tanymal áleýmettik jeliler atalmysh aryz boıynsha jaýapker bolyp tabylmaıdy, sóz tek Google, Facebook, Twitter jáne LiveJournal saıttarynda «Respýblıka» men «Vzglıad» resýrstaryn qaıtalaıtyn jeke jáne belgili bir paraqshalar men blogtar jóninde bolyp otyr. Eger atalmysh basylymdardyń taralýyna tyıym salatyn sot sheshimi shyǵatyn bolsa, onda joǵaryda atalǵan ınternet-portaldardyń ákimshiligi aldynda, tolyq portaldy emes, naqty paraqshalardy jaýyp tastaý jóninde saýal qoıylady», - dep atap ótti N.Súıindikov.
Resmı ókildiń atap ótkenindeı, aryzdar «Respýblıka», «Vzglıad» basylymdaryna, «Stan TV» beıneportalyna jáne «K+» telearnasyna qatysty berildi.
