QR Bas prokýratýrasy buqaralyq aqparat quraldaryna, qoǵamdyq birlestikterge jáne ózge de múddeli tulǵalarǵa málimdeme taratty
ASTANA. Jeltoqsannyń 30-y. QazAqparat - QR Bas prokýratýrasy barlyq buqaralyq aqparat quraldaryna, qoǵamdyq birlestikterge jáne ózge de múddeli tulǵalarǵa elimizdiń QHR-ǵa eksportqa shyǵarý maqsatynda aýylsharýashylyq ónimderin óndirý úshin jer beretindigi jaıynda shyndyqqa sáıkes kelmeıtin málimetter taratqany úshin jaýapkershilikke tartylatyndyǵy jaıynda málimdeme jasady.
Bul málimdemeni atalǵan vedomstvonyń baspasóz qyzmeti taratyp otyr.
«Sońǵy ýaqytta ártúrli buqaralyq aqparat quraldary jáne qoǵamdyq birlestikterdiń jekelegen ókilderiniń tarapynan QHR-ǵa eksportqa shyǵarý maqsatynda aýylsharýashylyq ónimderin óndirý úshin jer bólýge qatysty shyndyqqa sáıkes kelmeıtin málimetter taratýǵa jol berilýde.
Anyq aqparatty bilmesten jáne istiń shynaıy jaǵdaıyn qasaqana burmalap, arandatýǵa nıettengen adamdar keıbir BAQ-tardy paıdalana otyryp, qoǵamdyq tártipti buzýǵa jáne Qazaqstan men QHR arasyndaǵy tatý kórshiles qarym-qatynasqa zalal keltirýge tyrysty.
Osyǵan baılanysty, Bas prokýratýra bul derek boıynsha materıaldardyń ulttyq arazdyqty nemese alaýyzdyqty qozdyrý, azamattardyń ulttyq ar-namysy men qadir-qasıetin qorlaý, ulttyq qatystylyǵy belgileri boıynsha olardyń aıryqshalyǵyn, artyqshylyǵyn nasıhattaý belgileriniń bar bolýyna qatysty saraptaýlyq zertteý jáne protsessýaldyq sheshim qabyldaý úshin quqyq qorǵaý organdaryna joldanǵanyn málimdeıdi.
Joǵaryda kórsetilgen qylmys quramy belgileriniń bar ekeni rastalǵan jaǵdaıda kináli tulǵalar zańnyń barlyq qataldyqtary boıynsha jaýapkershilikke tartylatyn bolady.
Sonymen qatar, Bas prokýratýra Konstıtýtsııanyń 6-babyna sáıkes jer jáne onyń basqa da tabıǵı resýrstary memleket menshiginde bolatynyn túsindiredi. Jer, sondaı-aq zańda belgilengen negizderde, sharttar men shekterde jeke menshikte de bolýy múmkin.
Jer kodeksine sáıkes, taýarlyq aýylsharýashylyǵy óndirisine jáne orman sharýashylyǵyna arnalǵan jerler sheteldik azamattardyń, azamattyǵy joq tulǵalardyń jáne sheteldik zańdy tulǵalardyń jeke menshiginde bola almaıdy.
Osylaısha, joǵaryda keltirilgen pikirler Qazaqstan Respýblıkasynyń zańnamasyna qaıshy keledi.
Konstıtýtsııa boıynsha, respýblıka qyzmetiniń túbegeıli qaǵıdalary retinde qoǵamdyq tatýlyq jáne saıası turaqtylyq, búkil halyqtyń ıgiligin kózdeıtin ekonomıkalyq damý bolyp tabylady.
«Buqaralyq aqparat quraldary týraly» Zańmen jýrnalısterge alynatyn aqparattyń rastyǵyn tekserý quqyǵy berilip, sonymen birge shyndyqqa sáıkes kelmeıtin aqparatty taratpaý mindeti júktelgen.
Konstıtýtsııanyń 39-baby boıynsha ultaralyq tatýlyqty buzatyn kez-kelgen áreket konstıtýtsııalyq emes dep tanylady.
Ulttyq qaýipsizdik jáne terrorızmge qarsy turý týraly zańnama da ultaralyq qatynastardyń jaǵdaıyn nasharlatýy múmkin áreketterdi zańsyz dep tanıdy.
Zańdylyqtyń buzylýyn eskertý jáne bolýy múmkin quqyqtyq saldarlardy boldyrmaý maqsatynda, Bas prokýratýra ulttyq arazdyqty nemese alaýyzdyqty qozdyrýǵa, azamattardyń ulttyq ar-namysy men qadir-qasıetin qorlaýǵa, ulttyq qatystylyǵy belgileri boıynsha olardyń aıryqshalyǵyn, artyqshylyǵyn nasıhattaýǵa baǵyttalǵan qasaqana is-áreketter Qylmystyq kodekstiń 64-babymen qarastyrylǵan qylmystyq jaýapkershilikke ákelip soqtyratynyn túsindiredi.
Ákimshilik quqyq buzýshylyqtar týraly Kodekste buqaralyq aqparat quraldarynda ultaralyq arazdyqty qozdyrýǵa jáne buqaralyq aqparat quraldaryna qasaqana jalǵan málimet berýge baǵyttalǵan materıaldardy jarııalaýǵa ruhsat bergeni úshin jaýapkershilik bekitilgen.
Sondaı-aq, «Buqaralyq aqparat quraldary týraly» Zańǵa sáıkes ekstremızmdi, ulttyq basymdyqty nasıhattaý jáne ultaralyq arazdyqty qozdyrýǵa baǵyttalǵan materıaldar jarııalaý jáne aqparat taratý buqaralyq aqparat quraldarynyń shyǵarylýyn toqtata turýǵa nemese toqtatýǵa negiz bolyp tabylady», delingen málimdemede.
