QR Bas prokýratýrasy alqasynyń otyrysynda jol qozǵalysy qaýipsizdigin qamtamasyz etý máseleleri qaraldy
ASTANA. Mamyrdyń 25-i. QazAqparat - Búgin Astanada Qazaqstan Respýblıkasy Bas prokýratýrasynyń kezekti alqa májilisi ótip, onda jol qaýipsizdigin qamtamasyz etý máseleleri, sondaı-aq jekelegen memlekettik organdardaǵy ákimshilik zańdardy qoldanýdaǵy zańdylyqtyń jáı-kúıi qaraldy, dep habarlady QR Bas prokýratýrasynyń baspasóz qyzmeti.
Baspasóz qyzmetiniń atap ótkenindeı, quzyretti organdardyń qoldanyp otyrǵan sharalaryna qaramastan, avtomobıl qozǵalysy salasynda apatty jaǵdaılar men adam shyǵyndary túbegeıli joıylmaı otyr. Osyǵan oraı, alqaǵa qatysýshylar qaralyp otyrǵan máseleniń jáne oǵan qatysty zańdardy odan ári jetildirýdiń, ýákiletti memlekettik organdardyń qyzmetteriniń tıimdiligin kóterýdiń ózektiligin atap kórsetti. Jol polıtsııasy organdarynyń apattylyqtyń jalpy kórinisin beretin esepke alý-tirkeý jumysyndaǵy eleýli kemshilikteri de qadap aıtyldy.
Sondaı-aq, alqaǵa qatysýshylar jol polıtsııasy, keden, Tótenshe jaǵdaılarmınıstrliginiń órt qadaǵalaý, memlekettik sáýlet-qurylys baqylaý organdarynyń ákimshilik zańdaryn qoldaný kezindegi azamattardyń konstıtýtsııalyq quqyqtaryn qamtamasyz etý máselelerin de talqylady.
Alqa jumysy barysynda Bas Prokýror Q. Mámı ýákiletti organdardan jol qaýipsizdiginiń joǵary deńgeıin qamtamasyz etýdi, vedomstvolyq aktilerde oryn alyp otyrǵan olqylyqtar men qarama-qaıshylyqtardy joıýdy, sondaı-aq ákimshilik materıaldardy qaraý barysynda zańdylyqtyń buzylý faktilerin boldyrmaýdy talap etti.
Alqadaǵy talqylaýdyń nátıjesinde jol qozǵalysy salasyndaǵy esepke alý-tirkeý tártibin jetildirýge, osy baǵyt boıynsha vedomstvolyq baqylaý men prokýrorlyq qadaǵalaýdy kúsheıtýge, sondaı-aq ákimshilik óndiriske tartylǵan azamattardyń quqyqtaryn qorǵaýǵa baǵyttalǵan sheshim qabyldady.
Alqa jumysyna QR Prezıdenti Ákimshiliginiń, Premer-Mınıstr Keńsesiniń, Joǵarǵy Sottyń ókilderi, ádilet, ishki ister, densaýlyq saqtaý, tótenshe jaǵdaılar mınıstrlikteriniń jaýapty laýazymdy adamdary jáne basqalar qatysty.
