QR Bas prokýratýrasy Áblázovti Reseıden nemese Ýkraınadan re-ekstradıtsııalaý týraly eshqandaı kelissózder júrgizip jatqan joq
Bul týraly Qazaqstan Respýblıkasy Bas prokýratýrasynyń baspasóz qyzmetinen habarlady.
Qazaqstan Respýblıkasynyń quqyq qorǵaý organdary senip tapsyrylǵan múlikti ıemdengendigi jáne talan-tarajǵa salǵandyǵy, aldaý jáne senimge qııanat keltirý arqyly bóten múlikti urlaǵandyǵy, zańsyz jolmen tabylǵan aqsha qarajattaryn zańdastyrǵandyǵy, bank qarajattaryn zańsyz paıdalanǵandyǵy, ókilettikti asyra paıdalanǵandyǵy jáne qylmystyq topqa basshylyq etkendigi boıynsha Qazaqstan Respýblıkasy Qylmystyq kodeksiniń 176-baby 3-bóliginiń «b» tarmaǵymen, 176-baby 3-bóliginiń «a», «b» tarmaqtary boıynsha - 24-babynyń 3-bóligimen, 177-baby 3-bóliginiń «a», «b» tarmaqtarymen, 193-baby 3-bóliginiń «b», «v» tarmaqtarymen, 220-babynyń 1-bóligimen, 228-babymen, 235-baby 3-bóligimen qarastyrylǵan) kiná taǵylyp otyrǵan M. Áblıazov basshylyq jasaǵan qylmystyq toptyń is-áreketterin tergeý ústinde.
Barynsha kólemdi jáne kúrdeli qylmystyq isterdiń biri bolyp tabylatyn bul qylmystyq istiń kólemi eki myń tomnan asady jáne 150-den astam epızodtan turady. Uıymdasqan qylmystyq toptyń jasaǵan áreketterinen keltirilgen shyǵynnyń anyqtalǵan somasy 7,5 mlrd. AQSh dollarynan asady.
Qylmyskerlerdiń is-áreketi tek Qazaqstan aýmaǵymen ǵana shektelmegen, qylmystardyń eleýli bóligi Qazaqstanda bastaý alyp, basqa elder aýmaǵynda, sonyń ishinde Reseı Federatsııasy men Ýkraınada aıaqtalǵan.
Qylmyskerler tek Qazaqstan Respýblıkasy men otandyq qarjy ınstıtýttaryna ǵana shyǵyn keltirýmen shektelgen joq. Qylmystyq árekettermen túrli sheteldik memleketter men zańdy tulǵalardyń múddelerine nuqsan keltirildi. Atap aıtqanda, Reseı Federatsııasynda Reseı Ortalyq bankiniń iri turaqtandyrǵysh zaımdary men jeke tulǵalardyń salymdary urlandy. Qylmyskerlerdiń Reseı men Ýkraınada keltirgen shyǵyndarynyń somasy mıllıardtaǵan dollarmen esepteledi.
Osyǵan baılanysty, sheteldik memleketterdiń birqatary ózderiniń ishki quqyqtyq jáne ákimshilik júıelerine sáıkes derbes ulttyq múddelerin basshylyqqa ala otyryp, uıymdasqan qylmystyq topty qylmystyq qýdalaýdy júzege asyrýda. Olardyń ishinde Reseı Federatsııasy men Ýkraınanyń quqyq qorǵaý organdary derbes qylmystyq isterge tergeý júrgizýde.
Birneshe memlekettiń tapsyrmasyna sáıkes halyqaralyq izdeýde júrgen Áblıazov Frantsýz Respýblıkasynyń bıligimen 2013 jylǵy 31 shildede ustalyp, qazirgi ýaqytta sot sanktsııasymen Lıon qalasynyń túrme mekemesinde qamaýda otyrǵandyǵy belgili.
2013 jylǵy tamyzda Qazaqstan Respýblıkasy, Reseı Federatsııasy jáne Ýkraına bir-birine táýelsiz, derbes túrde jáne ár eldiń ulttyq zańnamasynyń talaptaryna sáıkes Áblázovti Frantsııadan ekstradıtsııalaý týraly saýaldar joldady.
Qazaqstan Respýblıkasynyń ekstradıtsııalyq saýaly Frantsııanyń Ádilet mınıstrliginiń aldyn ala qaraýynda jatyr.
Ekstradıtsııalaýǵa qatysty reseılik jáne ýkraınalyq saýaldardy frantsýzdyq ókiletti sot 2014 jylǵy 24 qazanda qarady. Lıon qalasynyń apellıatsııalyq trıbýnaly Reseı Federatsııasy men Ýkraınanyń saýaldaryn qanaǵattandyrý týraly usynym berip, Reseı Federatsııasynyń paıdasyna basymdyqty belgiledi.
Sot sheshimi birneshe talappen jáne saýal joldaǵan elderge baǵyttalǵan ımperatıvtik sıpattaǵy aldyn ala sharttarmen ilese júrýde.
Atap aıtqanda, Reseı Federatsııasy da, Ýkraına da qylmyskerdi Frantsııanyń aldyn ala ruqsatynsyz úshinshi elderge bermeıtini týraly Frantsýz Respýblıkasyn kepildikpen qamtamasyz etýi kerek.
Deı turǵanmen, Qazaqstannyń Bas prokýratýrasy ózi joldaǵan saýaldyń frantsýzdyq bılik pen ókiletti sotta qaralýyn basa ótinýde jáne Áblázovtiń qylmystyq tobyn qylmystyq qýdalaýdan bas tartpaq emes.
Qazaqstannyń Bas prokýratýrasy Áblázovti Reseıden nemese Ýkraınadan re-ekstradıtsııalaý týraly eshqandaı kelissózder júrgizgen emes ári júrgizip jatqan joq jáne halyqaralyq quqyqtyq yntymaqtastyq qaǵıdattaryn qatań ustanatyndyǵyn, halyqaralyq quqyqtyq yntymaqtastyqqa qatysýshylardyń kez kelgen ózara ýaǵdalastyqtary men mindettemelerin qurmetteıtindigin habarlaıdy.
Qylmystyq jaýapkershilikten jaltarý úshin qylmyskerler qoldanyp otyrǵan túrli aıla-sharǵylar men áreketter, sonyń ishinde egemendi elder men olardyń quqyq qorǵaý organdaryna qylmystyq qýdalaýdyń saıası astary bar ekeni týraly kiná taǵyp otyrǵanyna qaramastan, qazir Qazaqstannyń quqyq qorǵaý organdarynyń negizgi nazary qylmystyq istiń tergelýin aıaqtaýǵa jáne keltirilgen zalaldy toltyrýdy qamtamasyz etýge baǵyttalǵan.
Bul mindetterdiń sátti sheshilýi qylmyskerlerdi qylmystyq qýdalaýdy tıimdi úılestirýge jáne jasalǵan qylmystardyń transulttyq sıpatyna oraı basqa memleketterdiń quqyq qorǵaý organdarymen tyǵyz yntymaqtastyq ornatýǵa baılanysty.
Birikken Ulttar Uıymynyń transulttyq uıymdasqan qylmyspen kúres jáne birqatar basqa halyqaralyq kelisimder mundaı yntymaqtastyq jasasýǵa quqyqtyq negiz bolyp tabylady.
Osy negizde Bas prokýratýra halyqaralyq quqyq normalary men adam jáne azamattyń negizgi quqyqtary men bostandyqtaryn qatań túrde saqtaı otyryp, sheteldik áriptestermen, sonyń ishinde Reseı men Ýkraınada udaıy jáne barynsha ashyq aqparat almasýdy jalǵastyra bermek.
Mundaı halyqaralyq quqyq pen yntymaqtastyqtyń standarttary men tetikteri jáne shekteri quqyqtyq kómek týraly halyqaralyq kelisimdermen jáne halyqaralyq quqyq qaǵıdattarmen aıqyn belgilengen jáne Qazaqstan Respýblıkasy bul talaptardy múltiksiz saqtaıdy.
Qazaqstannyń buryn joldaǵan saýaly boıynsha ekstradıtsııalyq rásimderdi jyldamdatý maqsatynda Qazaqstannyń Bas prokýratýrasy Frantsııanyń ýákiletti organdarymen kelisýdi odan ári jalǵastyra bermek.
