QR Bala quqyqtary jónindegi ýákil Aqtóbeniń Qopa aýylynda saýalnama júrgizdi

AQTÓBE. KAZINFORM – QR Bala quqyqtary jónindegi ýákil Dınara Zakıeva Aqtóbe oblysy Qopa aýylyna baryp, mektepte saýalnama júrgizdi. Bıllıng, balalar arasyndaǵy tóbelestiń aldyn alý úshin atqarylýy tıis birneshe jumys jaıyn bólisti.

QR Bala quqyqtary jónindegi ýákil Dınara Zakıeva Instagram jelisindegi paraqshasynda Qopa aýylyna baryp, oqýshylarmen kezdeskenin habarlady. Onda oqýshy ólimi men mekteptegi qazirgi ahýaldy baǵamdady.

«Munda barlyq qyzmettiń jumysyn qarap shyqtym. Psıholog, áleýmettik qyzmetker men jasóspirim isteri jónindegi ınspektor jumysyn baǵamdap, prokýrormen birge oqýshylar arasynda saýalnama júrgizildi. Sonymen birge psıhologtyń byltyr alǵan saýalnama qorytyndysyna mán berdim. Mektepte úlkender ózinen kishilerdi «tárbıeleıdi» degen «júıe» bar ekeni anyqtaldy. Sonymen birge bopsalaýdyń belgileri bar ózge de másele jaıy belgili boldy. Munyń bárin aýdan ákimine, mektep basshylyǵy men jergilikti polıtsııa qyzmetine berdim. Sebebi alǵashqy kezdesýde olar munyń bárin joqqa shyǵanǵan edi», - dep jazdy QR Bala quqyqtary jónindegi ýákil Dınara Zakıeva. Onyń aıtýynsha, jasyrý problemanyń sebebin anyqtap, jeke dara qıyndyqtardy eńserýge kedergi keltiredi.

Aıta keteıik, QR Bala quqyqtary jónindegi ýákil Aqtóbe oblysynyń ákimi Ashat Shaharovpen, Aqtóbe oblysynyń prokýrory Halıdýlla Daýeshovpen kezdesken. Dınara Zakıeva býllıng pen jasóspirimder arasyndaǵy qylmys elimizdiń barlyq óńirinde ózekti, aldyn alý úshin keshendi jumys isteý kerek ekenin atap ótti. Ári birneshe jolyn usyndy.

«Mektepke jasóspirimder isi jónindegi ınspektordy qaıtarý kerek. Buryn ár mektepte ınspektor boldy jáne ol óz nátıjesin berdi. Keıin barlyq ınspektorlardy ýchaskelik polıtsııa qyzmetine aýystyrdy. Qopa aýyly kiretin Temir aýdanynda 27 mektepte 3 jasóspirimder isteri jónindegi ınspektor bar. Ár aýylǵa barý úshin shamamen 2-3 saǵat kerek. Oblysta 430 mektep bar, onda nebári 60 ınspektor bar. Bul mekteptegi jaǵdaı týraly tolyqqandy aqparat alýǵa kedergi keltiredi jáne balalar arasyndaǵy quqyqbuzýshylyqtyń kóbeıýine ákeledi. Psıhologtar men oqýshylardan jedel aqparat alyp, ishki tergeý júrgizý jáne tez arada shara qoldaný úshin ınspektor mektepte bolýy tıis», - dep jazdy Dınara Zakıeva.

Sonymen birge bala quqyqyn qorǵaý jumystary álsiz ekenin, Bilim basqarmalaryndaǵy bólimdi bólý baǵytynda jumys atqarylyp jatqanyn jetkizdi. Bul Bala quqyqtaryn qorǵaý departamenti bolýy múmkin. Áleýmettik pedagogtar da osy departamentte qyzmet etse, mektep, mektep dırektorynyń qandaı da bir oqys oqıǵany jasyryp qalý deregi azaıatynyn jazdy.

«Qamqorshylyq organy qyzmetkerleriniń sanyn 1 mamanǵa 5 myń bala dep zań aıasynda bekitý qajet. Qazir qalalarda 450 balaǵa 5 qyzmetkerden keledi. Demek 1 mamanǵa 90 myń bala. Bul baǵyttaǵy jumysty men byltyr jeltoqsannan beri Balalardyń quqyǵyn qorǵaý komıtetimen jáne depýtat ıÝ.Kýchınskıımen birge atqarylyp kelemin. Túzetý qazir Úkimet qaraýynda», - dep jazdy QR Bala quqyqtary jónindegi ýákil.

Onyń aıtýynsha, býllıng pen mekteptegi zorlyq-zombylyqtyń aldyn alý maqsatynda Psıhologııalyq qoldaý ortalyqtary jumys istep tur. Býllıngke qarsy KiVA baǵdarlamasy iske qosyldy. Pılottyq joba elimizdegi 110 mektepke engizilgen. Bara-bara barlyq mektepte bolady. 111 baılanys ortalyǵy da jumys istep tur.

Eske salsaq, Temir aýdany Qopa aýylynda oqýshylar tóbelesip, 9 synyp oqýshysy kóz jumdy. Birden jumys toby quryldy. Úsh oqýshy kúdikke iligip, qamaýǵa alyndy.