QR aýyr atletteri Taılandtaǵy chempıonattyń altyn, kúmis jáne qolasyn enshiledi
ASTANA. QazAqparat - Taılandtyń soltústigindegi Shıańgymaı qalasynda aýyr atletıkadan ótip jatqan halyqaralyq EGAT chempıonaty máresine jetti. Chempıonattyń búgingi sońǵy kúni qazaqstandyq aýyr atletter úsh medalge qol jetkizdi, dep habarlaıdy QazAqparat tilshisi QR aýyr atletıka federatsııasynyń baspasóz qyzmetine silteme jasap.
Aýyr atletıkadan ótip jatqan halyqaralyq chempıonattyń búgin sońǵy kúni ótti. Atalmysh chempıonat - 2020 jyly Tokıoda ótetin Olımpıada oıyndarynyń lıtsenzııasyn sarapqa salatyn saıystardyń biri. Chempıonattyń sońǵy kúni aýyr atletterimiz qorjynǵa eki kúmis jáne bir qola medal saldy.
Eske sala ketsek, keshe 81 kelige deıingi salmaqtaǵy sanatta Qazaqstan quramasynyń qorjyny altyn medalmen tolyqqan bolatyn. Nurlybek Sámenov qossaıys boıynsha 333 keli (julqı kóterýde 153 keli, serpe kóterýde 180 keli) salmaqty kóterdi. Sonymen birge, Nurlybek julqı kóterýdegi jattyǵýy úshin kishi altyn medalge jáne serpe kóterýdegi jattyǵýy úshin kishi altyn medalge qol jetkizgen edi.
Al búgin ulttyq qurama sapynda el namysyn qorǵaýǵa barǵan Álıhan Shaıhıdınov pen Ibragım Bersanov kúmis medalge ıe bolsa, Selimhan Abýbakarov úshinshi orynnan kórindi.
Federatsııadan habarlanǵandaı, 109 kelige deıingi salmaqta el namysyn qorǵaǵan Ibragım Bersanov qossaıys boıynsha 372 kelini (julqı kóterýde 172, serpe kóterýde 200) kóterip, ekinshi orynǵa ıe boldy. Al Qyrǵyzstannyń aýyr atletine ǵana ese jibergen Álıhan Shaıhıdınov qossaıysta 325 keli (145 - 180) salmaqty baǵyndyryp, qorjynǵa ekinshi kúmis medaldi saldy. Al 109 keliden joǵarǵy salmaq boıynsha óner kórsetken Selimhan Abýbakarov qossaıysta 370 keli (170 - 200) salmaqty baǵyndyryp chempıonattyń qola medalin enshiledi.
«Bul chempıonatta buryn halyqaralyq saıystarda óner kórsetpegen sportshylar el namysyn qorǵady. Alǵashqy halyqaralyq start bolsa da, jastarymyz ózin jaqsy kórsetti. Bizdiń qurama erler arasynda jalpykomandalyq esepte úshinshi orynmen qaıtyp barady», - deıdi aýyr atletıkadan ulttyq quramanyń bas bapkeri ıÝrıı Melnıkov.
