QR Aýyr atletıka federatsııasy quramanyń shettetilýine qatysty pikir bildirdi
ASTANA. QazAqparat - 21 qazanda Halyqaralyq aýyr atletıka federatsııasy tarapynan 2008 jáne 2012 jyldardaǵy Olımpıada oıyndarynda dopıng zańdylyqtaryn úsh jáne odan da kóp ret buzǵan sportshylary bar elderdi bir jyldyq dıskvalıfıkatsııalaý týraly málimdemesi jasaldy.
Atalǵan tizimge Ázerbaıjan, Belarýs, Qazaqstan, Qytaı, Moldova, Reseı, Armenııa, Túrkııa jáne Ýkraına engen. Bul týraly QR Aýyr atletıka federatsııasynyń aqparatynda aıtylǵan, dep habarlaıdy QazAqparat.
Atalǵan habarlamaǵa sáıkes, Qazaqstan quramasy halyqaralyq jarystardan bir jylǵa shettetildi, ıaǵnı búginnen bastap, 2018 jylǵy 19 qazanǵa deıin. Bul sheshim 2016 jyldyń maýsymynda Tbılısıde IWF Atqarýshy komıteti otyrysynyń qorytyndysy boıynsha qabyldanǵan edi.
Osy sheshim qabyldanǵan ýaqyttan beri QR Aýyr atletıka federatsııasy jarystardan shettetý sharasy dopıngpen kúreste eń tıimdi qadam bolyp tabylmaıtyndyǵyn habarlady. Sebebi bundaı sheshimder adal atletterdiń múddesine qaıshy, ásirese, jastardyń ózderiniń múmkindikterin kórsetýge kedergi keltiredi.
Máseleni qarastyrýdyń barlyq kezeńderinde qazaqstandyq federatsııa dıskvalıfıkatsııany almastyrý úshin taza sportty alǵa jyljytý salasynda ózine qosymsha mindettemelerdi alýǵa daıyn ekenin málimdedi. Atalǵan dálelderdi IWF qabyldady jáne tıisti sheshimde aýyr atletıkadan Qazaqstannyń jasóspirimderi úshin jeńildetilgen jazanyń tetikteri qarastyrylǵan. Osyǵan baılanysty olar 2018 jyldyń 6-18 qazanynda Argentınada ótetin jasóspirimder Olımpıada oıyndaryna daıyndyqty jalǵastyrady. Sonymen qatar QR AAF ókilderi ózderiniń qyzmetin halyqaralyq jáne azııalyq federatsııalardyń basqarýshy organdarynda jalǵastyrady.
Belgili bolǵandaı, atalmysh 9 elde dıpıngpen kúres salasyndaǵy jaǵdaıdy monıtorıngileý boıynsha IWF-tiń arnaıy komıssııasy qurylady. Osyǵan baılanysty qazaqstandyq federatsııa bul komıssııamen jan-jaqty birlese jumys isteýge ázirligin tanytyp otyr.
