QR aýyr atletıka federatsııasy dopıng daýyna ilikken sportshylarǵa qoldaý kórsetedi
ASTANA. QazAqparat - QR aýyr atletıka federatsııasy dopıng daýyna ilikken ziltemirshilerge quqyqtyq qoldaý kórsetedi. Árbir zańdyq kezeńderden keıin QR AAF baspasóz arqyly qoǵamǵa tyń aqparattar usynyp otyrady, dep habarlady federatsııanyń baspasóz qyzmeti.
Eske sala keteıik, Halyqaralyq aýyr atletıka federatsııasy Beıjiń Olımpıadasynda dopıng-synamasy oń nátıje bergen ziltemirshilerdiń tizimin jarııa etti. Olardyń qatarynda tórt qazaqstandyq sportshy: Vladımır Sedov, Maııa Maneza, Marııa Grabovetskaıa men Irına Nekrasova bar.
Halyqaralyq olımpıada komıtetiniń jáne Dúnıejúzilik antıdopıngtik agenttiktiń erejelerine sáıkes, Lozannada QR UOK ókilderiniń qatysýymen «B» dopıng-synamasyn qaıta tekserý sharasy ótti, onda da sportshylardyń qanynan tyıym salynǵan zattar anyqtaldy. Olardyń qatarynda Ilıa Ilın, Svetlana Podobedova, Zúlfııa Chınshanlo jáne Maııa Maneza da bolǵan edi.
