QR aýyr atletıka federatsııasy dopıng daýyna baılanysty óz tergeýin júrgizetin bolady
ALMATY. QazAqparat- QR aýyr atletıka federatsııasy dopıng-baqylaý boıynsha Jasulan Qydyrbaev, Ermek Ómirtaı jáne Almas Óteshovten alynǵan «A» synamasynan tyıym salynǵan preparattyń tabylýyna baılanysty QR Mádenıet jáne sport mınıstrligimen birlesip, tergeý jumystaryn bastady. Bul týraly búgin atalmysh federatsııanyń baspasóz qyzmetinen habarlady.
Dopıng-synama sportshylardan taıaýda AQSh-tyń Hıýston qalasynda ótken Álem Chempıonatynan keıin ile-shala alynǵan bolatyn. Olar osy birinshilikte júldeli oryndarǵa qol jetkizgen edi.
Endi tergeýdiń barlyq materıaldary jáne birlesken komıssııanyń qorytyndysy Halyqaralyq aýyr atletıka federatsııasyna jiberiledi jáne osy uıymnyń tártiptik komıssııasynyń kezekten tys otyrysynda qaralatyn bolady. Osy jıynda qazaqstandyq atletterge nemese olardyń sport-medıtsınalyq ortasyna qosymsha tártiptik jaza qoldaný nemese ony jumsartý nemese tipti jazany alyp tastaý týraly sheshim qabyldanýy múmkin.
«Dopıngpen kúres - bizdiń federatsııa jumysynyń basymdy baǵyttarynyń biri. Biz jyl saıyn ár túrli jastaǵy ziltemirshiler men olardyń sporttyq ortasyna arnap, kóptegen oqytý semınarlaryn júrgizemiz. Bıyl ziltemirshiler arasynda 6 semınar jáne 186 jeke áńgime júrgizildi.
Biz dopıngke qarsy qazaqstandyq zerthanamen birlesip, atletterimizdi jıi tekserip turamyz. Mysaly, bıyl - 2015 jyly dopıng-baqylaý boıynsha 418 ziltemirshiden synama alynǵan bolatyn. Olardyń altaýy - oń nátıje berdi.
Biz dopıngtiń abyroı da jeńis te ápermeıtindigin sportshylarǵa jıi aıtamyz. Sondyqtan, tájirıbeli sportshylarymyz - Almas Óteshov, Jasulan Qydyrbaev jáne Ermek Ómirtaıdyń jarystarǵa ýaqytsha qatysý quqyǵynan aırylýy jáne olardyń tyıym salynǵan preparattardy qabyldaýlaryna baılanysty kúdikti dep tanylǵandaryna biz qatty kúıinip otyrmyz.
Monreal zerthanasy búginde álemdegi eń úzdik zerthana ekeni belgili. Sondyqtan, onyń sheshimine narazylyq bildirý búgingi tańda múmkin bolmaı otyr. Degenmen, biz atletterimizdiń adal ekendikterine shúbá keltirmeımiz jáne olardy qorǵaýǵa barynsha kúsh salamyz.
Sportshylarymyzǵa qatysty dopıng-synamanyń oń nátıje bergendigi biz úshin baryp turǵan soraqy derek, bul jerde bireýdiń kóriner-kózge qatelik jibergeni kórinip-aq tur. Buǵan bizdiń jigitterdiń eshqandaı qatysy joqtyǵyna senimdimiz. Biz jaǵdaıdy anyqtaý úshin qoldan kelgenniń barlyǵyn jasaımyz jáne bizdiń atletterdiń tamaǵyna nemese dárýmenderine tyıym salynǵan preparattyń salynýyna sebepshi bolǵan tulǵalardy áshkereleýge barynsha kúsh salamyz. Eger kináli azamat atletterdiń óz aınalasynan tabylar bolsa. onda Halyqaralyq aýyr atletıka federatsııasymen birlese otyryp, mundaı adamdy sporttan múldem alastatý jáne sport jarystaryna qatysý quqyǵynyn aıyrý týraly sheshim qabyldaımyz», - dedi osyǵan oraı QR Aýyr atletıka federatsııasynyń bas hatshysy Omar Mustafın.
