QR Aýyr atletıka federatsııasy 2020 jyly Azııa chempıonatyn ótkizýge nıet bildirgenin rastady
ASTANA. QazAqparat - Azııa aýyr atletıka federatsııasynyń atqarý komıtetiniń otyrysynda Qazaqstannyń aýyr atletıka federatsııasy el aýmaǵynda 2020 jylǵy qurlyqtyq chempıonatty ótkizý týraly nıetin rastady, dep habarlaıdy «SPORTINFORM» SAA federatsııanyń baspasóz qyzmetine silteme jasap.
Sondaı-aq, otyrys kezinde Azııa qurlyǵynda aýyr atletıkany damytý máselesi, 2018 jylǵy jazǵy Azııa oıyndaryna jáne 2019 jyly Úndistanda ótetin Azııa chempıonatyna daıyndyq barysy talqylandy.
Shara barysynda qazaqstandyq tarap IWF jáne AWF basshylyǵymen kezdesý ótkizdi. Onda Qazaqstan 2020 jylǵy Olımpıada oıyndarynyń kvalıfıkatsııalyq erejelerine sáıkes kvota kólemin qysqartý máselesine qatysty óz pikirin bildirdi.
2004, 2009 jáne 2013 jyldary úsh márte qurlyq birinshiligi Qazaqstanda ótken bolatyn.
