QR Aýyl sharýashylyǵy mınıstrligi janynan úsh qoǵamdyq keńes quryldy

Bul týraly búgin baspasóz máslıhaty barysynda atalǵan vedomstvoǵa qarasty Strategııa jáne korporatıvtik damý departamentiniń dırektory Serik Ibraev málim etti.

«Biz kórsetiletin memlekettik qyzmet sapasyn arttyrý maqsatynda úsh qoǵamdyq keńes qurý týraly sheshim qabyldadyq. Onyń birinshisi - veterınarııa jáne asyl tuqymdy mal sharýashylyǵy, ekinshisi - eginshilik jáne fıtosanıtarııalyq qaýipsizdik, al úshinshisi - tabıǵat resýstaryn paıdalaný salasynda», dedi ol.

Al atalǵan mınıstrliktiń Agroónerkásip kesheniniń memlekettik ınspektsııasy komıteti tóraǵasynyń orynbasary Mars Almabektiń atap ótýinshe, atalǵan qoǵamdyq keńesterdiń basty maqsaty aýyl sharýashylyǵy mamandarymen birlesip, negizdeme bolǵan jaǵdaıda qajetti zańdarǵa tolyqtyrýlar men ózgertýler engizý bolmaq.

Jalpy qazirgi tańda Aýyl sharýashylyǵy mınıstrligi memlekettik qyzmettiń 56 túrin usynady. Olardyń basym bóligi reglamenttelip, standarttalǵan. Al qalǵandaryn standarttaý 2012 jyly aıaqtalmaq.