QR Aýyl sharýashylyǵy mınıstrligi respýblıkada bıootynnyń óndirilýine baılanysty túsinik berdi
ASTANA. 31 naýryz. QazAqparat - QR AShM 2011 jyldyń 30 naýryzy kúni zakon.kz aqparattyq portalynda QR Úkimetiniń 2011 jylǵy 1 naýryzyndaǵy №204-shi qaýlysyna silteme jasaı otyryp, aǵymdaǵy jyly Qazaqstan 2,8 mlrd. lıtr bıootyn óndiretindigi týraly jarııalanǵan aqparatqa qatysty túsinikteme jasady.
AShM-nyń baspasóz qyzmetiniń habarlaýynsha, atalmysh aqparat oqyrmandardyń narazylyǵyn týdyryp otyrǵandyǵy oryndy. Sebebi, azyq-túlik taýarlar baǵasynyń qazirgi jaǵdaıynda memleket azyq-túlik shıkizattaryn bıootyn óndirýge jumsamaq degen pikir týyndaıdy.
Túsinikteme bergen AShM, QR Úkimetiniń 2011 jylǵy 1 naýryzyndaǵy №204-shi qaýlysy bıootynnyń shyǵarý josparlanǵan kólemin emes, eldiń azyq-túlik qaýipsizdigine nuqsan keltirmeı, Qazaqstan Respýblıkasynda bıootyn óndirýi múmkin bolatyn zaýyttardyń barlyǵynyń óndiristik qýattaryn (barynsha múmkin) qosa eseptegendegi kólemin kórsetetindigin aıtty. Onymen birge, zaýyttardyń qurylysy men bıootynnyń óndirisi boıynsha eshqandaı talaptar men josparlar týraly mindettemeler qoıylyp otyrǵan joq.
Vedomstvonyń baspasóz qyzmeti anyqtap bergendeı, búgingi kúni respýblıkada bıootyn óndiretin tek bir ǵana zaýyt (Soltústik Qazaqstan oblysy Taıynshy aýdanyndaǵy «Bıohım» AQ) jumys isteıdi. Onyń bir jyldyq óndiris qýaty 57 mln. lıtrdi quraıdy.
