QR Aýyl sharýashylyǵy mınıstrligi maıly daqyldar tuqymyna úshinshi el úshin eksporttyq baj salyǵyn engizýdi usynady
ASTANA. Qyrkúıektiń 27-si. QazAqparat /Marlan Jıembaı/ - QR Aýyl sharýashyǵy mınıstrligi maıly daqyldar tuqymyna úshinshi el úshin eksporttyq baj salyǵyn engizýdi usynady. Bul týraly búgin el Úkimetiniń Internette tikeleı kórsetilip jatqan otyrysynda atalǵan vedomstvonyń basshysy Aqylbek Kúrishbaev málim etti.
Onyń aıtýyna qaraǵanda, aǵymdaǵy jyly jınalatyn maıly daqyldardyń jalpy kólemi 780 myń tonnany quraıdy dep boljanyp otyr. Jınalǵan ónimnen shamamen 270 myń tonna ósimdik maıy alynady. Bul ishki naryqty ósimdik maıymen tolyq qamamasyz etýge jetkilikti.
«Sonymen qatar negizgi eksporttaýshy elderdegi, ásirese Ýkraına men Reseıdegi maıly daqyldardyń jalpy túsiminiń tómendeýi shıkizattyń syrtqa aǵylýyna ári daıyn ónimniń qunynyń ósýine alǵy shart bolýy múmkin», dedi ol óz sózinde.
Mınıstr qorǵaný sharasy retinde úshinshi el úshin, máselen Reseı Federatsııasyna, maıly daqyl tuqymyna eksporttyq kedendik baj salyǵyn engizýdi usyndy. Onyń atap ótýinshe, qazirgi ýaqytta sáıkes qaýly jobasy barlyq memlekettik organdarmen kelisilgen.
Sondaı-aq A.Kúrishbaev ósimdik maılarynyń barlyq túrlerin, onyń ishinde zyǵyr men rapsty qospaǵandaǵy maıly daqyldar tuqymyna respýblıkadan tysqary shyǵarýǵa ýaqytsha shekteý qoıý týraly másele talqylanǵandyǵyn atap ótti.
